(ម៉ិកស៉ីកូ)៖ ម៉ិកស៉ិកបានចាប់ផ្តើមបញ្ជូនទាហាន ទៅកាន់ព្រំដែនភាគខាងជើង ជាផ្នែកមួយនៃការដាក់ពង្រាយកម្លាំង ១០ ០០០នាក់ ដែលលោកស្រីប្រធានាធិបតី Claudia Sheinbaum បានសន្យាជាមួយលោក ដូណាល់ ត្រាំ ប្រធានាធិបតីអាមេរិក ដើម្បីជាថ្នូរនឹងការពន្យារពេលដាក់ពន្ធ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី៥ ខែកុម្ភៈ ឆ្នាំ ២០២៥។

មួយថ្ងៃក្រោយព្រមព្រៀងជាមួយ លោក ត្រាំ ចាត់វិធានការប្រឆាំងការធ្វើអន្តោប្រវេសន៍ខុសច្បាប់ និងការរត់ពន្ធសារធាតុញៀន fentanyl ឆ្លងព្រំដែន លោកស្រី Sheinbaum គូសបញ្ជាក់ថា <<ការដាក់ពង្រាយបានចាប់ផ្តើមហើយ>>។

សមាជិករាប់រយនាក់នៃឆ្មាំជាតិ បានឡើងជិះយន្តហោះយោធា នៅទីក្រុង Merida ភាគអាគ្នេយ៍ ឆ្ពោះទៅព្រំដែនម៉ិកស៉ិក-អាមេរិក។ ពួកគេបានទៅដល់ទីក្រុង Tijuana ភាគខាងត្បូងរដ្ឋ California និងទីក្រុង Ciudad Juarez ជាប់ព្រំដែនរដ្ឋ Texas។ តាមលោក Jose Luis Santos អ្នកសម្របសម្រួលឆ្មាំជាតិក្រុង Ciudad Juarez <<នឹងមានការល្បាត តាមបណ្តោយព្រំដែនអាមេរិក-ម៉ិកស៉ិកទាំងមូលតែម្តង>>។

គួរបញ្ជាក់ថា ម៉ិកស៉ិក បានសន្យាម្តងហើយម្តងទៀត តាំងពីជំនាន់លោក ចូ បៃដិន នៅកាន់តំណែង ថានឹងដោះស្រាយ លំហូរខុសច្បាប់នៃគ្រឿងញៀន និងជនអន្តោប្រវេសន៍ ខណៈដែលរដ្ឋជាប់ព្រំដែនរបស់ខ្លួន មានបញ្ហាសន្តិសុខធ្ងន់ធ្ងររួចហើយ ទោះជាមានទាហានរាប់ពាន់នាក់ ឈរជើងក៏ដោយ៕