(ភ្នំពេញ)៖ ក្រសួងបរិស្ថាន និងធនាគារអភិវឌ្ឍន៍ជនបទ និងកសិកម្ម (ARDB) នៅរសៀលថ្ងៃទី៥ ខែកុម្ភៈ ឆ្នាំ២០២៥ បានចុះ​អនុស្សរណៈយោគយល់គ្នា​ ​ក្នុងគោលបំណងសហការគ្នាគាំទ្រគោលនយោបាយរបស់រាជរដ្ឋាភិបាល ក្នុងការចូលរួមដោះស្រាយបញ្ហាការប្រែប្រួលអាកាសធាតុ ដោយផ្អែកលើសកម្មភាព (Mitigation) និងការបង្កើនភាពធន់នឹងការប្រែប្រួលអាកាសធាតុ​ តាមរយៈការផ្តល់ហិរញ្ញប្បទានបៃតង។

ថ្លែងក្នុងពិធីចុះហត្ថលេខាលើអនុស្សរណៈយោគយល់គ្នារវាងក្រសួងបរិស្ថាន និងធនាគារ ARDB បណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយក ARDB បានថ្លែងថា តាមរយៈអនុស្សរណៈនៃការយោគយល់គ្នានេះ ធនាគារ ARDB នឹងសហការយ៉ាងជិតស្និទ្ធិជាមួយក្រសួងបរិស្ថាន ក្នុងការផ្តល់ហិរញ្ញប្បទានបៃតង ឱ្យកាន់តែមានប្រសិទ្ធភាព និងលើកកម្ពស់ការយល់ដឹងជាសាធារណៈពាក់ព័ន្ធនឹងនិរន្តរភាពបរិស្ថាន និងភាពធន់របស់វិស័យកសិកម្ម។

​លោកបន្តថា <<ខ្ញុំសង្ឃឹមថា កិច្ចសហប្រតិបត្តិការរវាងក្រសួងបរិស្ថាន និងធនាគារ ARDB នឹងផ្តល់ជាផលវិជ្ជមាន ស្របតាមឆន្ទៈ និងចក្ខុវិស័យរួមក្នុងការលើកកម្ពស់ការអភិវឌ្ឍប្រកបដោយចីរភាព ក៏ដូចជាស្របតាមតួនាទី ភារកិច្ចរបស់ស្ថាប័នទាំងពីរ ដែលជាផ្នែកមួយជួយគាំទ្រដល់គោលដៅអភិវឌ្ឍន៍ ដែលមានលក្ខណៈប្រកួតប្រជែង មានបរិយាប័ន្ន ធន់នឹងការប្រែប្រួលអាកាសធាតុ និងមាននិរន្តរភាព ព្រមទាំងធានានូវជីវភាពរស់នៅ ប្រកបដោយសុខុមាលភាព សម្រាប់ប្រជាជនជំនាន់ក្រោយ>>។

បណ្ឌិត កៅ ថាច បានលើកឡើងផងដែរថា ​ធនាគារ​ ARDB​ ជាធនាគាររដ្ឋបម្រើគោលនយោបាយ របស់រាជរដ្ឋាភិបាល ដែលត្រូវបានបង្កើតឡើងតាំងពីឆ្នាំ១៩៩៨ ដែលមកទល់បច្ចុប្បន្ននេះមានរយៈពេល ២៦ឆ្នាំ​ ​និងមានបេសកកម្មចម្បង ក្នុងការអភិវឌ្ឍវិស័យកសិកម្ម និងសេដ្ឋកិច្ចជនបទ។ ធនាគារ ARDB ដើរតួយ៉ាងសំខាន់ក្នុងការផ្តល់ហិរញ្ញប្បទានគាំទ្រ ដល់គ្រប់តួអង្គក្នុងខ្សែច្រវាក់តម្លៃកសិកម្ម,កសិ-ឧស្សាហកម្ម និងហិរញ្ញប្បទានបៃតង។ ដើម្បីសម្រេចចក្ខុវិស័យនេះ ធនាគារបានរៀបចំផែនទីបង្ហាញផ្លូវរយៈពេល១០ឆ្នាំ និងផែនការអាជីវកម្ម៣ឆ្នាំរំកិល សំដៅក្លាយជាគ្រឹះស្ថានឈានមុខគេ ក្នុងការផ្តល់ហិរញ្ញប្បទានបៃតងប្រកបដោយនិរន្តរភាព។

លោកបន្ថែមថា ធនាគារ ARDB ​ក៏បានផ្តល់សេវាផ្សេងទៀត ជូនអតិថិជនគោលដៅ ដោយអនុលោមតាមគោលការណ៍អភិបាលកិច្ចល្អ និងការទទួលខុសត្រូវសង្គម និងបរិស្ថាន។ ក្នុងបរិបទនេះ ធនាគារចាំបាច់មានកិច្ចសហប្រតិបត្តិការជាមួយក្រសួង-ស្ថាប័នពាក់ព័ន្ធ និងដៃគូអភិវឌ្ឍន៍នានា ក្នុងនោះក្រសួងបរិស្ថានជាក្រសួងដែលដើរតួនាទីយ៉ាងសំខាន់ លើកិច្ចអភិវឌ្ឍន៍ប្រកបដោយនិរន្តរភាព ដោយផ្តោតលើកិច្ចគាំពារបរិស្ថាននៅកម្ពុជា និងការអនុវត្តគោលនយោបាយជាតិស្តីពីការអភិវឌ្ឍបៃតង និងផែនការយុទ្ធសាស្រ្តជាតិ ស្តីពីការអភិវឌ្ឍបៃតងឆ្នាំ២០១៣-២០៣០ ដែលមានចក្ខុវិស័យបៃតង ធ្វើឱ្យមានសមភាព តុល្យភាព និងវឌ្ឍនភាព រវាងសេដ្ឋកិច្ច បរិស្ថាន សង្គម និងវប្បធម៌​​។

លោកបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានថ្លែងថា ដើម្បីសម្រេចបានជោគជ័យ ក្នុងការអនុវត្តគោលនយោបាយ និងផែនការសកម្មភាពរបស់រាជរដ្ឋាភិបាលលើវិស័យបរិស្ថាន និងការប្រែប្រួលអាកាសធាតុ គឺទាមទាឱ្យមានការចូលរួមទាំងអស់គ្នា ទាំងស្ថាប័នរដ្ឋ និងវិស័យឯកជន។

លោកគូសបញ្ជាក់​ផងដែរ អំពីកាលានុវត្តភាពជាច្រើនសម្រាប់ វិស័យឯកជន ក្នុងការចាប់យកការវិនិយោគបៃតង កាត់បន្ថយការបញ្ចេញ ឧស្ម័នផ្ទះកញ្ចក់ និងទទួលបានឥណទានកាបូន ដែលអាចជួយកាត់បន្ថយថ្លៃដើមនៃការវិនិយោគ។ ​ឧទាហរណ៍ដូចជា​ គម្រោងកាត់បន្ថយការបញ្ចេញឧស្ម័នមេតានពីដំណាំស្រូវ គម្រោងចាប់យកឧស្ម័នមេតានពីកសិដ្ឋាន ចិញ្ចឹមជ្រូក ឬរោងចក្រផលិតម្សៅមី រោងចក្រផលិតអគ្គិសនីពីថាមពលកកើតឡើងវិញ។ ទាំងអស់នេះ សុទ្ធតែឱកាសសម្រាប់វិស័យឯកជន ទាញយកឥណទានការបូន។

លោកបន្ថែមថា ពិតមែនហើយ ការវិនិយោគទាំងនេះ ត្រូវការបច្ចេកទេសរៀបចំឯកសារ ការសិក្សា និងទុនបន្ថែមដែលអាចមានផលលំបាក សម្រាប់វិស័យឯកជននៅពេលដែល​មានទុនបម្រុងតិចតួច សម្រាប់ប្រើប្រាស់លើការងារអាទិភាព។

លោកបណ្ឌិត អ៊ាង សុផល្លែត លើកឡើងបន្តថា <<ខ្ញុំសង្ឃឹមថា តាមរយៈគម្រោង Cambodian Climate Financing Facility ដែលផ្តល់មូលនិធិពីមូលនិធិអាកាសធាតុបៃតង (GCF) ក្រសួងសេដ្ឋកិច្ចនិងហិរញ្ញវត្ថុ និងដៃគូពាក់ព័ន្ធ នឹងជួយដល់ វិនិយោគគិនរបស់យើង ក្នុងការជំនះបានលើកង្វះហិរញ្ញវត្ថុ សម្រាប់ការវិនិយោគបៃតង។ ក្រសួងបរិស្ថាន ក្នុងនាមជាស្ថាប័នជាតិនៃមូលនិធិ អាកាសធាតុបៃតង (NDA) សូមគាំទ្រលើគម្រោង Cambodian Climate Financing Facility និងត្រៀមខ្លួនជាស្រេចផ្តល់កិច្ចសហការ ជាមួយ ARDB និងភាគីពាក់ព័ន្ធ ដើម្បីធានាបានជោគជ័យការអភិវឌ្ឍ បៃតងនៅកម្ពុជា>>៕