(អូតាវ៉ា)៖ កាលពីថ្ងៃចន្ទសប្តាហ៍នេះ នាយករដ្ឋមន្រ្តីកាណាដា លោក Justin Trudeau បានប្រកាសថានឹងចុះចេញពីតំណែង នៅប៉ុន្មានខែខាងមុខនេះ បន្ទាប់ពីកាន់អំណាចអស់រយៈពេល ៩ឆ្នាំ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី៧ ខែមករា ឆ្នាំ ២០២៥។

លោក Trudeau បានប្រាប់​សន្និសីទ​សារព័ត៌មាន​ថា លោក​នឹង​បន្ត​នៅ​ជា​នាយក​រដ្ឋមន្ត្រី និង​ជាមេដឹកនាំ​ Liberal party ​រហូត​ដល់​គណបក្ស​ជ្រើសរើស​បានប្រធាន​ថ្មី ​ក្នុង​រយៈពេល​ប៉ុន្មាន​ខែទៀត។ លោកបញ្ជាក់ថា <<កាណាដា សមនឹងទទួលបានជម្រើសពិតប្រាកដមួយ នៅក្នុងការបោះឆ្នោតអាណត្តិក្រោយ ហើយវាច្បាស់ណាស់សម្រាប់ខ្ញុំថា ប្រសិនបើខ្ញុំត្រូវប្រយុទ្ធជាមួយសមរភូមិផ្ទៃក្នុង នោះខ្ញុំមិនអាចជាជម្រើសដ៏ល្អបំផុត នៅក្នុងការបោះឆ្នោតនោះទេ>>។

តាមលោក Trudeau សភា​នឹង​ត្រូវ​ផ្អាក​ដំណើរការ រហូត​ដល់​ថ្ងៃ​ទី​២៤ ខែ​មីនា។ មានន័យថា ការបោះឆ្នោតមួយទំនងជាមិនអាចធ្វើឡើងទេ មុនខែឧសភា ឆាប់បំផុត ដូច្នេះលោក Trudeau នឹងនៅតែទទួលបន្ទុក យ៉ាងហោចណាស់ ដើមទីនៃការដោះស្រាយទាក់ទងនឹងពន្ធគយ ដែលប្រធានាធិបតីជាប់ឆ្នោតអាមេរិក លោក ដូណាល់ ត្រាំ ធ្លាប់គំរាមដាក់ចេញ។

គួរបញ្ជាក់ថា កាណាដា ត្រូវរៀបចំការបោះឆ្នោតអាណត្តិក្រោយ នៅថ្ងៃទី២០ ខែតុលា ឆ្នាំ ២០២៥ ហើយការស្ទង់មតិបង្ហាញថា អ្នកបោះឆ្នោតដែលខឹងសម្បារនឹងបញ្ហាតម្លៃខ្ពស់ កង្វះលំនៅឋានសមរម្យ អាចជ្រើសរើសគណបក្សអភិរក្សនិយម ដូចនេះនឹងធ្វើឱ្យគណបក្ស Liberal ត្រូវបរាជ័យ មិនថានរណាជាអ្នកដឹកនាំគណបក្សនោះទេ៕