(ភ្នំពេញ)៖ លោកបណ្ឌិត ចន ណារិទ្ធអនុរដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការក្រុមប្រឹក្សា ជាតិគាំពារសង្គម នារសៀលថ្ងៃទី១ ខែមេសា ឆ្នាំ២០២៥ បានដឹកនាំក្រុមការងារចុះពិនិត្យស្ថានភាពនៃការរស់នៅជាក់ស្តែងរបស់ស្រ្តីមានផ្ទៃពោះ និងកូនតាមម្តាយអាយុក្រោម ២ឆ្នាំ នៅក្នុង មណ្ឌលអប់រំកែប្រែទី២ (ម២) ក្នុងគោលបំណងដើម្បីធានាថាយន្តការនៃការអនុវត្តកម្មវិធីឧបត្ថម្ភសាច់ប្រាក់ជូនជនជាប់ឃុំជាស្រ្តីមានផ្ទៃពោះ និងកូនតាមម្តាយអាយុក្រោម២ឆ្នាំ នៅក្នុងពន្ធនាគារដែលរាជរដ្ឋាភិបាល តាមរយៈក្រុមប្រឹក្សាជាតិគាំពារសង្គមគ្រោងនឹងដាក់ចេញក្នុងពេលឆាប់ៗខាងមុខនេះអាចបំពេញតម្រូវការជាក់ស្តែងដល់ក្រុមគោលដៅពេញលីញ និងគ្រប់ជ្រុងជ្រោយ។

លោកបណ្ឌិត ចន ណារិទ្ធ លើកឡើងថា ឈរលើលើស្មារតី<<មិនបោះបង់ពលរដ្ឋណាម្នាក់>> និងបន្ទាប់ពីទទួលបានការណែនាំដ៏ខ្ពស់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ក្នុងការគិតគូរផ្តល់អត្ថប្រយោជន៍នៃកម្មវិធីឧបត្ថម្ភ សាច់ប្រាក់ជូនស្រ្តីមានផ្ទៃពោះ និងកុមារអាយុក្រោម២ឆ្នាំ ដល់ជនជាប់ឃុំជាស្រ្តី និងកូនតាមម្តាយក្នុងពន្ធនាគាររួចមក, អគ្គលេខាធិការក្រុមប្រឹក្សាជាតិគាំពារសង្គមសង្គម បានធ្វើការ សម្របសម្រួលរៀបចំកិច្ចប្រជុំពិភាក្សាជាបន្តបន្ទាប់ជាមួយក្រសួង-ស្ថាប័នពាក់ព័ន្ធ ដើម្បីអាចឱ្យការពង្រីកវិសាលភាពនៃកម្មវិធីនេះទៅដល់ជនជាប់ឃុំជាស្រ្តីមានផ្ទៃពោះ និងកូន តាមម្តាយអាយុក្រោម២ឆ្នាំ បានទទួលជោគជ័យ និងស្របតាមលិខិត បទដ្ឋានកិតិយុត្តពាក់ព័ន្ធនានា ខណៈនីតិវិធីសម្រាប់អនុវត្តកម្មវិធីនេះ ជូនដល់ជនជាប់ឃុំជាស្រ្តី និងកូនតាមម្តាយក្នុងពន្ធនាគារនេះមានភាពស្មុគស្មាញដែលទាមទារឱ្យមានការយកចិត្តទុកដាក់សិក្សាឱ្យបានស៊ីជម្រៅ និងគ្រប់ទិដ្ឋភាពពីគ្រប់ភាគីពាក់ព័ន្ធ។

លោកបណ្ឌិត បានបន្តថា ដំណើរទស្សនកិច្ចមកកាន់មណ្ឌលអប់រំកែប្រែទី២ លើកនេះ គឺធ្វើឡើងក្នុងបំណងស្វែងយល់ពីស្ថានភាពជាក់ស្តែងរបស់ក្រុមគោលដៅ ដើម្បីជាធាតុចូលបន្ថែមក្នុងការគិតគូរផ្តល់រៀបចំផ្តល់ប្រាក់ឧបត្ថម្ភដល់ជនជាប់ឃុំស្ត្រីមានផ្ទៃពោះ និងកូនតាមម្តាយអាយុក្រោម ២ឆ្នាំ និងដើម្បី ធានាថាយន្តការនៃការអនុវត្តកម្មវិធីដែលបានស្នើឡើង ព្រមទាំងបទដ្ឋានគតិយុត្តពាក់ព័ន្ធមានភាពស្របគ្នានឹងស្ថានភាពជាក់ស្តែងមុនឈានទៅចាប់ផ្តើមអនុវត្តនាពេលឆាប់ៗខាងមុខ។

សូមជម្រាបជូនថាការពង្រីកវិសាលាភាព កម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអាយុក្រោម២ឆ្នាំ ទៅដល់ជនជាប់ឃុំក្នុងពន្ធនាគារនេះដែលរាជរដ្ឋាភិបាល គ្រោងនឹងប្រកាសដាក់ចេញក្នុងពេលឆាប់ៗខាងមុខនេះ ជាកម្មវិធីដែលនឹងចូលរួមលើកកម្ពស់សុខុមាភាពមាតា និងទារក, ដោះស្រាយបញ្ហាកង្វះអាហាររូបត្ថម្ភ, ជំរុញការលូតលាស់ កាយសម្បទា និងបញ្ញាស្មារតី ក៏ដូចជាផ្តល់ការគាំពារដល់កូន ដែលមិនមានទោសតាមម្តាយមករស់នៅក្នុងពន្ធនាគារ៕