(កំពង់ឆ្នាំង)៖ ប្រជាពលរដ្ឋអ្នកធ្វើស្រូវប្រាំងរាប់រយហិកតា នៅតំបន់ <<បឹងបណ្តាញ>> ឃុំស្វាយរំពារ ស្រុកកំពង់លែង បានដាក់លិខិតស្នើសុំអភិបាលខេត្តកំពង់ឆ្នាំង ជួយអន្តរាគមន៍រឿងអាជ្ញាធរលក់បឹងនេះ ពោលគឺពួកគាត់មិនចង់ ឲ្យមានការលក់ដូរនោះទេ។ នេះក៏ព្រោះតែក្រោយពេលបឹងនេះត្រូវបានលក់ដូរ ប្រជាពលរដ្ឋត្រូវតែបង់ថវិកា ២៥ម៉ឺនរៀល ក្នុងទំហំស្រែ ១ហិកតា និងមិនអាចចូលនេសាទត្រីលក្ខណៈគ្រួសារដូចមុនទៀតបានឡើយ។

ក្នុងលិខិតស្នើទៅអភិបាលខេត្ត កាលពីថ្ងៃទី២៦ ខែមីនា ឆ្នាំ២០២៥ ប្រជាពលរដ្ឋបានអះអាងថា នៅក្នុងឆ្នាំ២០២៤-២០២៥ អាជ្ញាធរភូមិក្នុង ភូមិចំបក់ខ្ពស់ និងមេឃុំ បានលក់បឹងបណ្តាញឲ្យឈ្មួញ ឈ្មោះ និល នីម។ ការលក់បឹងនេះ បានធ្វើឲ្យពួកគាត់ជួបការលំបាកយ៉ាងខ្លាំង គ្មានទឹកធ្វើស្រែ ព្រោះឈ្មួញទិញបឹងនេះ បានបូមទឹកចោលដើម្បីចាប់ត្រី។ ប្រជាពលរដ្ឋ មិនអាចចូលនេសាទ ដាក់មង និងដាក់លបបានឡើយ សូម្បីតែចូលរើសខ្យង ចងសន្ទួច ក៏មិនបានដែរ។

ក្នុងលិខិតដែលបណ្តាញព័ត៌មាន Fresh News ទទួលបាននៅថ្ងៃទី៣ ខែមេសា ឆ្នាំ២០២៥ ក៏បានឲ្យដឹងបន្តទៀតថា នៅឆ្នាំ២០២២-២០២៣ ពួកគាត់បានអង្គាសលុយគ្នាជួលគ្រឿងចក្រទៅស្តារប្រឡាយ តែត្រូវអាជ្ញាធរឃុំឃាត់ មិនឲ្យស្តារ។ ពេលអត់ទឹក ត្រូវទិញពីគេចាក់ចូលស្រែក្នុងមួយហិកតា ២៥ម៉ឺនរៀល។

ទន្ទឹមនេះ តាមរយៈការសម្ភាសប្រជាពលរដ្ឋឃុំស្វាយរំពារ គឺពួកគាត់បានស្នើលោកអភិបាលខេត្តកំពង់ឆ្នាំង យ៉ាងទទូចជាទីបំផុត ដើម្បីជួយអន្តរាគមន៍រឿងខាងលើនេះផង។ ពួកគាត់ បានលើកឡើងយ៉ាងក្រៀមក្រំថា ពួកគាត់ដាំស្រូវនៅទីនេះទាំងត្រដរ ខណៈអ្នកមានស្រែជិតខាងមួយចំនួនទៀត មិនហ៊ានធ្វើស្រូវទេ ព្រោះដឹងថាខ្វះទឹកប្រើប្រាស់។

ជាមួយគ្នានេះលោក ហង្ស សុផល អតីតមេប៉ុស្តិ៍ឃុំស្វាយរំពារ បានឲ្យដឹងថា ថ្មីៗនេះឈ្មួញដែលទិញបឹងបណ្តាញ បានបូមទឹកចាប់ត្រីអស់រលីង ធ្វើឲ្យប្រជាពលរដ្ឋគ្មានទឹកដើម្បីប្រើប្រាស់ និងបានធ្វើឲ្យងាប់ស្រូវ។ នៅពេលភ្លៀងធ្លាក់ ប្រជាពលរដ្ឋ៤នាក់ ចូលចាប់ត្រី បានប្រមាណម្នាក់២គីឡូក្រាម ក៏ត្រូវបានគេប្តឹង និងត្រូវបានឃាត់ខ្លួន ខណៈពលរដ្ឋទាំង៤នាក់ គេឲ្យសង៤០ម៉ឺនរៀល។

លោក ហង្ស សុផល ក៏បានឲ្យដឹងថា ទំនប់បាដាញ គឺជាប្រភពទឹកមួយក្នុងចំណោម៣ បូកទាំងបឹងនគរទ្វីបនៅខាងកើតភ្នំទេពី និងបឹងចក នៅខាងកើតបឹងនគរទ្វីប ដែលត្រូវបានលក់ទាំងអស់ ក្នុងតម្លៃ ១២លានរៀល។

ក្រោយទទួលបានព័ត៌មាននេះ ភ្នាក់ងារព័ត៌មាន Fresh News ក៏បានទាក់ទងសុំការបំភ្លឺទៅកាន់រដ្ឋបាលស្រុកំពង់លែងផងដែរ ដោយរដ្ឋបាលស្រុក បានឲ្យដឹងនៅថ្ងៃទី២៦ ខែមីនា ឆ្នាំ២០២៥ថា អាជ្ញាធរក៏ទទួលបទញ្ជា ពីអភិបាលខេត្តកំពង់ឆ្នាំងលើករណីនេះដែរ ហើយអះអាងថា នឹងពិនិត្យមើល។

ជាមួយគ្នានេះ នាយនគរបាលប៉ុស្តិ៍ឃុំស្វាយរំពារ បានឲ្យដឹងថា កាលពីថ្ងៃទី២៣ ខែមីនា ឆ្នាំ២០២៥ មានប្រជាពលរដ្ឋ៣នាក់ បានបង់សំណាញ់ចាប់ត្រីនៅទំនប់បណ្តាញ ស្រាប់តែឈ្មោះ និល នីម និងប្រពន្ធ លឹម ស៉ី បានប្តឹងមកប៉ុស្តិ៍ទាមទារសង ២០ម៉ឺនរៀល។

លោក ឌី អឿន ជំទប់ទី១ បានបញ្ជាក់ថា ការដោះដូរត្រីក្នុងមេទឹកបណ្តាញក្នុងតម្លៃ ៧លានរៀល ហើយលោកមេឃុំបានយកថវិកានេះ ទៅសងថ្លៃជួសជុលទំនប់ ១៦៥ឡាន កាលពីឆ្នាំ២០២៤។ ចំពោះការបូមទឹកចាប់ត្រី គឺបូមចាប់ត្រីផង និងបូមយកស្រោចស្រពស្រូវខាងក្រោមទំនប់ផង ហើយចំពោះស្រែដែលសារព័ត៌មានថតនេះ គឺស្រែធ្វើក្នុងមេទឹកដែលជួលពីលោក ហង្ស សុផល ជាឪពុករបស់ពលរដ្ឋម្នាក់ដែលទៅចាប់ត្រី និងដែលត្រូវបានលោក និល នីម និងប្រពន្ធប្តឹង តែនគរបាលមិនមានការឃាត់ខ្លួននោះឡើយ៕