(ព្រះវិហារ)៖​ យ៉ាងហោចណាស់មនុស្សចំនួន៣នាក់ បានរងរបួសធ្ងន់ស្រាល ត្រូវបានរថយន្តសង្គ្រោះដឹកជញ្ជូនទៅធ្វើការសង្គ្រោះភ្លាមៗនៅឯមន្ទីរពេទ្យ ចំណែករថយន្តរងការខូចខាតធ្ងន់ធ្ងរនៅផ្នែកខាងមុខ ដោយសារករណី គ្រោះថ្នាក់ចរាចរណ៍ រថយន្តផ្ទុះកង់មុខពេលកំពុងបើកបរ ហើយរេចង្កូតបុកបង្កាន់ដៃស្ពាន នៅព្រឹកថ្ងៃទី០៣ ខែមេសា ឆ្នាំ២០២៥ លើកំណាត់ផ្លូវជាតិលេខ៦៤ ក្នុងភូមិស្រែពោធិ៍ ឃុំគូលែនត្បូង ស្រុកគូលែន ខេត្តព្រះវិហារ​។​

លោកវរសេនីយ៍ឯក ឱ សេង អធិការនគរបាលស្រុកគូលែន បានថ្លែងប្រាប់ថា មុនពេលកើតហេតុ គេឃើញរថយន្តម៉ាកសាំយ៉ុងពណ៌សំបកឪឡឹក ពាក់ផ្លាកលេខត្បូងឃ្មុំ 2A.5028 បើកបរក្នុងទិសដៅពីលិចទៅកើត ដោយដឹកជញ្ជូនផ្លែឈើយ៉ាងសំពីងសំពោង ក្នុងទិសដៅទៅខេត្តក្រចេះ លុះដល់កន្លែងកើតហេតុ​រថយន្តបានបែកកង់មុខផ្នែកខាងស្តាំ បណ្តាលឱ្យរេចង្កូតបុកបង្កាន់ដៃស្ពាន និងធ្វើឱ្យមនុស្ស៣នាក់ រងរបួសធ្ងន់ស្រាល ភ្លាមៗនោះត្រូវបានសមត្ថកិច្ចទាក់ទងរថយន្តសង្គ្រោះមណ្ឌលសុខភាពគូលែន បញ្ជូនទៅសង្គ្រោះនៅឯមន្ទីរពេទ្យ។​

លោកអធិការស្រុកគូលែនថ្លែងបញ្ជាក់ទៀតថា ជនរងគ្រោះទាំង៣ មានឈ្មោះ៖

* ទី១៖ ស៉ឹម សុភា ភេទប្រុស អាយុ២៦ឆ្នាំ ជាអ្នកបើកបរ មានទីលំនៅភូមិសំបូរ ឃុំកោះស​ ស្រុកសំបូរ​ ខេត្តក្រចេះ​ រងរបួសស្រាល​ * ទី២៖ ឈ្មោះ យួន ដានីភេទប្រុសអាយុ២៦ ឆ្នាំមានទីលំនៅភូមិសំបូរ ឃុំកោះស​ ស្រុកសំបូរ​ ខេត្តក្រចេះ​ រងរបួសស្រាល​ អ្នករួមដំណើរ​ * និងទី៣៖ ឈ្មោះ ស៊ាង រតនា ភេទស្រីអាយុ២៨ ឆ្នាំ មានទីលំនៅភូមិស្រែស្ដៅ​ ឃុំចិត្របុរី​ ស្រុកចិត្របុរី​ ខេត្តក្រចេះ​រងរបួសស្រាល។

ចំណែកវត្ថុតាង​រថយន្ដ​ ត្រូវបានកម្លាំងសមត្ថកិច្ច​យកមករក្សាទុកនៅអធិការដ្ឋាន​នគរបាលស្រុក។

ទាក់ទងករណីគ្រោះថ្នាក់ចរាចរណ៍នេះដែរ លោក ឱ សេង អធិការនគរបាលស្រុកគូលែន សន្និដ្ឋានថា៖

* ទី១៖ បណ្តាលមកពីសំបកកង់រថយន្តមិនមានគុណភាព * ទី២៖ បណ្តាលមកពីដឹកជញ្ជូនធ្ងន់ ដឹកសំពីងសំពោង * និងទី៣៖ បណ្តាលមកពីបើកបរលឿន ហើយអ្នកបើកបរងងុយគេង មិនអាចគ្រប់គ្រងសភាពការណ៍ពេលជួបគ្រោះថ្នាក់បានទាន់ពេលវេលា។

​ប៉ុន្តែទោះជាយ៉ាងណាលោកអធិការស្រុក ក៏បានថ្លែងអំពាវនាវដល់ប្រជាពលរដ្ឋត្រូវបើកបរគោរពច្បាប់ចរាចរណ៍ ត្រូវយករថយន្តទៅត្រួតពិនិត្យលក្ខណៈបច្ចេកទេសឱ្យបានទៀងទាត់ និងកុំបើកបរស្ថិតក្នុងភាពងងុយគេងជាដាច់ខាត៕