(ភ្នំពេញ)៖ ប្រធានរដ្ឋសភាកម្ពុជា សម្តេចមហារដ្ឋសភាធិការធិបតី ឃួន សុដារី បានផ្ញើសាររំលែកទុក្ខជូនឯកឧត្តមបណ្ឌិត សាយសំផន ភូមិវិហាន (Saysomphone Phomvihane) ប្រធានរដ្ឋសភាសាធារណរដ្ឋប្រជាធិបតេយ្យប្រជាមានិតឡាវ ចំពោះមរណភាពអតីតប្រធានរដ្ឋឡាវ កាលពីថ្ងៃទី២ ខែមេសា ឆ្នាំ២០២៥។

សម្តេចមហារដ្ឋសភាធិការធិបតី ឃួន សុដារី បានបញ្ជាក់ថា <<ខ្ញុំមានសេចក្តីសោកសង្រេងជាពន់ពេក ដោយទទួលបានដំណឹងដ៏ក្រៀមក្រំ ពីមរណភាពរបស់ឯកឧត្តម នាយឧត្តមសេនីយ៍ ខាំតៃ ស៊ីផាន់ដន (Khamtay Siphandone) អតីតប្រធានគណៈកម្មាធិការមជ្ឈិមនៃបក្សបដិវត្តន៍ឡាវ និងជាអតីតប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ កាលពីថ្ងៃទី២ ខែមេសា ឆ្នាំ ២០២៥ ក្នុងជន្មាយុ ១០២ឆ្នាំ>>។

ក្នុងវេលាដ៏សោកសៅនេះ តាងនាមរដ្ឋសភានៃព្រះរាជាណាចក្រកម្ពុជា និងក្នុងនាមរូបខ្ញុំផ្ទាល់ ខ្ញុំសូមចូលរួមរំលែកទុក្ខយ៉ាងក្រៀមក្រំបំផុត ជូនចំពោះឯកឧត្តមប្រធាន និងប្រជាជនឡាវជាអ្នកភូមិផងរបងតែមួយ ព្រមទាំងក្រុមគ្រួសារនៃសព ចំពោះការបាត់បង់រដ្ឋបុរសដ៏ឆ្នើម ដែលបានរួមចំណែកដ៏ធំធេងក្នុងបុព្វហេតុកសាង និងរក្សាស្ថិរភាពនយោបាយ និងការអភិវឌ្ឍសេដ្ឋកិច្ចសង្គមនៃសាធារណរដ្ឋប្រជាធិបតេយ្យប្រជាមានិតឡាវ។

ក្នុងអំឡុង ពេលកាន់តំណែង ឯកឧត្តម នាយឧត្តមសេនីយ៍ ខាំតៃ ស៊ីផាន់ដន បានខិតខំប្រឹងប្រែងយ៉ាងខ្លាំងក្លា ក្នុងការពង្រឹងទំនាក់ទំនងទ្វេភាគីរវាងប្រទេសឡាវ និងប្រទេសកម្ពុជា ក៏ដូចជាការពង្រីកទំនាក់ទំនងជាមួយប្រទេស ដទៃផ្សេងទៀតក្នុងតំបន់ និងលើឆាកអន្តរជាតិ។

រដ្ឋសភានៃព្រះរាជាណាចក្រកម្ពុជា សូមចូលរួមកាន់ទុក្ខដ៏ក្រៀមក្រំនេះ ជាមួយរដ្ឋសភានៃសាធារណរដ្ឋប្រជាធិបតេយ្យប្រជាមានិតឡាវ និងសូមបួងសួងឱ្យវិញ្ញាណក្ខន្ធ ឯកឧត្តម នាយឧត្តមសេនីយ៍ ខាំតៃ ស៊ីផាន់ដន បានទៅកាន់សុគតិភពកុំបីឃ្លៀងឃ្លាតឡើយ៕