(ស្ទឹងត្រែង)៖ លោកគ្រូ អ្នកគ្រូ និងសិស្សានុសិស្សចំនួន ១,១១៣នាក់ មកពីវិទ្យាល័យពីរក្នុងខេត្តស្ទឹងត្រែង បានចូលរួមដង្ហែខ្សែព្រ័ត្រ ក្នុងទម្ងន់ ៣០០គីឡូក្រាម និងមានប្រវែង ២០០ម៉ែត្រ នឹងនាំយក​ទៅ​តម្កល់ទុកនៅមន្ទីរអប់រំ យុវជន និងកីឡាខេត្តស្ទឹងត្រែង ត្រៀមទុកបំបែកកំណត់ត្រាលេងល្បែងប្រជាប្រិយខ្មែរ ល្បែងទាញព្រ័ត្រប្រវែង ២០០ម៉ែត្រ ដើម្បីចូលរួមអបអរពិធីបុណ្យចូលឆ្នាំថ្មី ប្រពៃណីជាតិខ្មែរ ដែលនឹងប្រព្រឹត្តទៅរយៈពេល ៣ថ្ងៃ ចាប់ពីថ្ងៃទី១៤-១៥-១៦ ខែមេសា ឆ្នាំ២០២៥នេះ។

សង្ក្រាន្តឆ្នាំ២០២៥ នៅខេត្តស្ទឹងត្រែង រំពឹងថា នឹងមានអ្នកចូលរួមទាញព្រ័ត្រយ៉ាងច្រើនកុះករ មកពីគ្រប់ស្ថាប័នរដ្ឋ មន្ទីរ អង្គភាព រដ្ឋបាលក្រុង ស្រុក លោកគ្រូ អ្នកគ្រូ សិស្សានុសិស្ស និងប្រជាពលរដ្ឋមក​ពីគ្រប់ទិសទី នឹងចូលខ្លួនមកបំបែកកំណត់ត្រាទាញព្រ័ត្រ ដែលជាល្បែងប្រជាប្រិយខ្មែរ មានតាំងពីយូរលង់មកហើយ មានប្រវែងប្រមាណ ២០០ម៉ែត្រ និងមានទម្ងន់ប្រមាណ ៣០០គីឡូក្រាម ដើម្បីអបអរសាទរក្នុងពិធីបុណ្យចូលឆ្នាំថ្មី ប្រពៃណីជាតិខ្មែរ នឹងឈានចូលមកដល់ នៅថ្ងៃទី១៤ ខែមេសា ឆ្នាំ២០២៥ ខាងមុខនេះ ។ក្រៅពីព្រឹត្តិការណ៍ដ៏ធំនៃការលេងល្បែងទាញព្រ័ត្រ ដែលមានទម្ងន់ ៣០០គីឡូក្រាមនោះ គឺជាការបំបែកកំណត់ត្រាថ្មី មិនធ្លាប់មានទេពីមុនមក ក៏នៅមានល្បែងប្រជាប្រិយខ្មែរជាច្រើនប្រភេទទៀត ដែលលើកយកលេងកម្សាន្ត នៅលើវេទិកានាគជ័យ នៃទីលានតេជោសន្តិភាព ខាងមុខសាលាខេត្ត ដែលបានរៀបចំឡើងដោយរដ្ឋបាលខេត្តស្ទឹងត្រែង ក្រោមការដឹកនាំរបស់អភិបាលខេត្តស្ទឹងត្រែងលោក សរ សុពុត្រា និងមានការយកចិត្តទុកដាក់រៀបចំចាត់ចែងពីលោក ញ៉ែម វណ្ណយុត្តិ នាយករដ្ឋបាលខេត្តស្ទឹងត្រែងផងដែរ។

លោក សរ សុពុត្រា បានឱ្យដឹងថា រដ្ឋបាលខេត្តស្ទឹងត្រែង នឹងរៀបចំព្រឹត្តិការណ៍ស្ទឹងត្រែងសង្រ្កាន្ត ឆ្នាំ២០២៥ ឱ្យមានភាពអធិកអធម ដើម្បីបង្កភាពសប្បាយរីករាយជូនប្រជាពលរដ្ឋ ដោយក្នុងនោះ មានរៀបចំល្បែងប្រជាប្រិយទាញព្រ័ត្រ ដ៏មហិមាដែលព្រ័ត្រនេះមានប្រហែល ២០០ម៉ែត្រ និងមានកម្មវិធីកម្សាន្តជាច្រើនទៀត ផងដែរ ។

ប្រធានមន្ទីរអប់រំ យុវជន និងកីឡាខេត្តស្ទឹងត្រែង និងជាប្រធានអនុគណៈកម្មការព្រ័ត្រមហិមា លោក ហ៊ាង ប៉ូលី បានឱ្យដឹងថា ក្រុមការងារបានធ្វើពិធីដង្ហែព្រ័ត្រ ដែលជាល្បែងប្រជាប្រិយខ្មែរ មានប្រវែង ២០០ម៉ែត្រ និងមានទម្ងន់ ៣០០គីឡូក្រាម និងបានសាកល្បងទាញព្រ័ត្រលើកទី១ ហើយព្រ័ត្រនេះសម្រាប់លេងកម្សាន្តរយៈពេល ៣ថ្ងៃ ក្នុងព្រឹត្តិការណ៍ស្ទឹងត្រែងសង្ក្រាន្ត (១៤-១៦មេសា២០២៥) ហើយព្រ័ត្រត្រូវបានដង្ហែរ​យកទៅតម្កល់ទុក នៅមន្ទីរអប់រំ យុវជន និងកីឡាខេត្តស្ទឹងត្រែង ។

លោក ហ៊ាង ប៉ូលី បានឱ្យដឹងទៀតថា ការទាញព្រ័ត្រសាកល្បងលើកទី១ នៅថ្ងៃទី១ ខែមេសា ឆ្នាំ២០២៥ម្សិលមិញនេះ មានការចូលរួមពីសំណាក់សិស្សានុសិស្ស និងលោកគ្រូ អ្នកគ្រូ ១ ១១៣នាក់ មកពីអនុវិទ្យាល័យ​ព្រះរាជបូជនីយកិច្ច និងវិទ្យាល័យហ៊ុន សែន ស្ទឹងត្រែង។

គួរបញ្ជាក់ថា ល្បែងទាញព្រ័ត្រ គឺជាល្បែងលេងកម្សាន្តសប្បាយរបស់ យុវជនខ្មែរទាំងបុរស ទាំងស្រ្ដី កំលោះ និងក្រមុំ។ ល្បែងទាញព្រ័ត្រ គេលេងដោយប្រើកម្លាំងកាយ និងលេងនៅក្នុងរដូវចូលឆ្នាំខ្មែរ គឺនៅក្នុងខែចេត្រ និងខែពិសាខ។ ល្បែងទាញព្រ័ត្រ ត្រូវបានរាជរដ្ឋាភិបាលកម្ពុជា ចុះក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិរបស់អង្គការយូណេស្កូ នៅថ្ងៃទី២ ខែធ្នូ ឆ្នាំ២០១៥ កន្លងមក៕