(តាកែវ)៖ កម្លាំងអធិការដ្ឋាននគរបាលស្រុកសំរោង ខេត្តតាកែវ បានចាប់ខ្លួនជនសង្ស័យម្នាក់ ពាក់ព័ន្ធករណីរក្សាទុក ជួញដូរ និងប្រើប្រាស់គ្រឿងញៀន នៅភូមិកំពង់ទ្រា ឃុំទ្រា ស្រុកសំរោង។ ការចាប់ខ្លួននេះដោយអនុវត្តតាមបទបញ្ជារបស់លោកឧត្តមសេនីយ៍ទោ ម៉ែន លី ស្នងការនគរបាលខេត្ត និងមានការសម្របសម្រួលពីព្រះរាជអាជ្ញា នៃអយ្យការអមសាលាដំបូងខេត្តតាកែវ។

លោក​វរសេនីយ៍ឯក​ ភី​ ឆុន​ អធិការនគរបាលស្រុកសំរោង​ បានឲ្យដឹងនៅថ្ងៃទី២៤ ខែមករា ឆ្នាំ២០២៥នេះ ប្រតិបត្តិការនេះធ្វើឡើងនៅថ្ងៃទី២២ ខែមករា ដោយកម្លាំងជំនាញប្រឆាំង​គ្រឿងញៀន នៃអធិការដ្ឋាននគរបាលស្រុកសំរោង និង​កម្លាំង​ប៉ុស្តិ៍​នគរបាល​រដ្ឋ​បាល​ទ្រា​។

លោកអធិការបានបញ្ជាក់ថា ជនសង្ស័យដែលសមត្ថកិច្ចចាប់ខ្លួនឈ្មោះ ចាន់​ ចិត្រា អាយុ២៤ឆ្នាំ មុខ​របរ​មិនពិតប្រាកដ​ រស់នៅ​ភូមិ​វែង ឃុំសិង្ហ ស្រុកសំរោង​ ខេត្តតាកែវ​ ព្រមទាំង​ដកហូតវត្ថុតាង​រួម​មាន ម្សៅ​ក្រាម​ពណ៌​ស​ថ្លា ​ចំនួន២៤កញ្ចប់, ម៉ូតូ១គ្រឿង​ និងទូរស័ព្ទ១គ្រឿង។ បច្ចុប្បន្នជនសង្ស័យ រួម​ទាំង​វត្ថុ​តាង​កម្លាំងជំនាញកំពុងកសាងសំណុំរឿង បញ្ជូនទៅស្នងការដ្ឋាននគរបាលខេត្តតាកែវ ដើម្បីចាត់ការតាមនីតិវីធី៕