(កណ្ដាល)៖ នាចុងសប្ដាហ៍កន្លងទៅនេះ ព្រះវិជ័យសីលមុនី​ កាន់ សំអុល ព្រះចៅអធិការវត្តជ័យឧត្តម បានធ្វើបុណ្យផ្កាប្រាក់សមាគមន៍មហាសាមគ្គីដើម្បីប្រមូលបច្ច័យមកកសាងអគារសិក្សា១ខ្នង ទទឹង១០ម៉ែត្រ បណ្តោយ ៧៣ម៉ែត្រ កម្ពស់២ជាន់១៦បន្ទប់ ដែលអាចទ្រទ្រង់កូនសិស្សសិក្សា៦០០នាក់ រៀនសូត្រនៅសាលាបឋមសិក្សាជ័យឧត្តម ឃុំសំរោងធំស្រុកកៀនស្វាយ ខេត្តកណ្តាល ដែលគ្រោងថវិកាចំណាយទាំងសម្ភារមួយឈុត ប្រមាណជា៤៥ម៉ឺនដុល្លារ។

ព្រះវិជ័យសីលមុនី​ កាន់ សំអុល ព្រះចៅអធិការវត្តជ័យឧត្តម បានមានដីការប្រាប់អ្នកយកព័ត៌មាន Fresh News ប្រចាំខេត្តកណ្តាលថា អ្នកផ្តើមបុណ្យផ្កាប្រាក់ដោយ លោកស្រីអគ្គមហាឧបាសិកា ធម្មរតនវិវឌ្ឍនា សុខឈាង ឧត្តមប្រឹក្សាគណៈសង្ឃនាយកគណៈមហានិកាយនៃព្រះរាជាចក្រកម្ពុជា និងមាតាបង្កើត លោក គួច ចំរើន អភិបាលខេត្តកណ្តាល និងលោកស្រីអគ្គមហាឧបាសិកាលោកអ្នកឧកញ៉ា ភាព ហៀក ស្ថាននិកក្រុមហ៊ុន ជីបម៉ុង ព្រមទាំងគណៈកម្មការអាចារ្យ និងពុទ្ធបរិស័ទចំណុះជើងវត្តទាំងអស់ដែលបានចូលរួមផងដែរ។

ព្រះវិជ័យសីលមុនី​ កាន់ សំអុល ព្រះចៅអធិការវត្តជ័យឧត្តម បានមានថេរដីកាបន្តថា ព្រះអង្គ នឹងនៅតែបន្តធ្វើបុណ្យ ដើម្បីប្រមូលបច្ច័យកសាងអគារសិក្សាតម្លៃជា៤៥ម៉ឺនដុល្លារនេះជាបន្តបន្ទាប់ ធ្វើយ៉ាងណាសំដៅដល់ការបញ្ចប់គម្រោងនេះយ៉ាងពិតប្រាកដ បន្សល់នូវស្នាដៃ កេរ្តិ៍មរតករបស់សប្បុរសទាំងឡាយ ដែលបានខិតខំរួមគ្នាកសាងអគារសិក្សានេះជូនដល់កូនចៅបានសិក្សារៀនសូត្រ ដ្បិតថា អគារសិក្សានៅក្នុងសាលាបឋមសិក្សានេះ មានសភាពចាស់ទ្រុឌទ្រោមណាស់ទៅហើយមានអាយុកាលសំណង់ជាង៦០ឆ្នាំមកហើយ។ ខណៈដែលអគារទាំងនោះ មានសភាពប្រេះស្រាំដោយដុំ ដូច្នេះ ដើម្បីធានាបាននូវសុវត្ថិភាពសិស្ស ទើបព្រះអង្គផ្ដើមគំនិតកសាងអគារថ្មីនេះឡើងដើម្បីជាចំណែកបុណ្យដ៏ធំធេងរបស់សប្បុរសជនទាំងឡាយដែលមានសទ្ធាជ្រះថ្លាជួយកសាងអគារនេះឡើង។

ជាមួយគ្នានេះដែរ លោក តាំង វុទ្ធី នាយកសាលាបឋមសិក្សាជ័យឧត្តម និងសិស្សានុសិស្សទាំងអស់ បានលើកម្រាមដៃដប់ថ្លែងអំណរគុណយ៉ាងជ្រាលជ្រៅជាបំផុតដល់ព្រះវិជ័យសីលមុនី​កាន់ សំអុល ព្រះចៅអធិការវត្តជ័យឧត្តម ,លោកគួច ចំរើន ថ្នាក់ដឹកនាំទាំងអស់ និងសប្បុរសជនគ្រប់ទិសទីទាំងឡាយ ដែលមានសទ្ធាជ្រះថ្លា រួមគ្នាចូលបច្ច័យជួយកសាងអគារសិក្សានេះឡើងយ៉ាងស្រស់ស្អាត រឹងមាំ ជូនដល់កូនខ្មែរ កូនចៅយើងឱ្យមានកន្លែងសិក្សារៀនសូត្រសមប្រកបដោយផាសុកភាព និងស្តង់ដាត្រឹមត្រូវ។

ជាមួយគ្នានេះដែរ លោកនាយក និងលោកគ្រូ អ្នកគ្រូទាំងអស់នៃសាលាបឋមសិក្សាជ័យឧត្តម ប្ដេជ្ញាបន្តខិតខំបង្រៀនដល់កូនចៅយើង ឱ្យអស់ពីសមត្ថភាព បង្រៀនប្រកបដោយគុណភាព យកបេះដូងមកបង្រៀន ដើម្បីបណ្ដុះបណ្ដាលកូនចៅយើងតាំងពីចំណេះដឹង អាកប្បកិរយា មាយាទល្អ សីលធម៌ល្អ សមប្រកបដោយចិត្តជ្រះថ្លា ក្លាយជាធនធានមនុស្សដ៏ល្អ និងពេញដោយសមត្ថភាព ដើម្បីជួយគ្នាកសាងប្រទេសជាតិ មាតុភូមិកម្ពុជាឱ្យកាន់តែរីកចម្រើនឡើង សមប្រកបដោយសន្តិភាព និងរុងរឿងទៅមុខជារៀងរហូត៕