(ព្រុចសែល)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានអះអាងថាលោកទទួលបានព័ត៌មានសម្ងាត់ ដែលបានរាយការណ៍ថាកូរ៉េខាងជើងកំពុងបង្វឹកកងទ័ព ១០ ០០០នាក់ ដើម្បីបញ្ជូនទៅជួយកងទ័ពរុស្ស៉ី នៅក្នុងសង្រ្គាមឈ្លានពានប្រឆាំងអ៊ុយក្រែន។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ការអះអាងបែបនេះរបស់លោក ហ្សេលេនស្គី ធ្វើឡើងក្រោយចូលរួមកិច្ចប្រជុំកំពូលថ្នាក់រដ្ឋមន្ត្រីការពារជាតិរបស់ NATO ក្នុងទីក្រុងព្រុចសែល កាលពីថ្ងៃព្រហស្បតិ៍ ទី១៧ ខែតុលា តែមិនបានបញ្ជាក់ឱ្យច្បាស់ថាតើកងទ័ពកូរ៉េខាងជើងទាំងនោះ កំពុងត្រូវបានបង្វឹកនៅទីណានោះទេ។ <<ពួកគេកំពុងត្រៀមបញ្ជូនកងទ័ព ១០ ០០០នាក់ ប៉ុន្តែពួកគេ មិនទាន់បញ្ជូនកងទ័ពទាំងនោះទៅរុស្ស៉ី ឬអ៊ុយក្រែននៅឡើយទេ>>។ នេះជាការគូសបញ្ជាក់របស់លោក ហ្សេលេនស្គី ដោយបន្ថែមថាកងទ័ព និងមន្ត្រីមួយចំនួនមកពី កូរ៉េខាងជើងកំពុងស្ថិតនៅក្នុងទឹកដីអ៊ុយក្រែន ដែលរុស្ស៉ីកំពុងកាន់កាប់រួចទៅហើយ។

គួរបញ្ជាក់ថា កាលពីពេលថ្មីៗ កូរ៉េខាងត្បូងបានអះអាងថាកងទ័ពកូរ៉េខាងជើងមួយចំនួនកំពុងជួយរុស្ស៉ី នៅក្នុងសង្រ្គាមប្រឆាំងអ៊ុយក្រែន ហើយលោក ហ្សេលេនស្គី ក៏ធ្លាប់ បានបញ្ជាក់ពីវត្តមានកងទ័ពកូរ៉េខាងជើងនៅក្នុងសង្រ្គាមអ៊ុយក្រែនផងដែរ។ ប៉ុន្តែខាងរុស្ស៉ីបានច្រានចោលការអះអាងបែបនេះ ហើយអំឡុងធ្វើសន្និសីទសារព័ត៌មានរួមគ្នា​ ជាមួយលោក ហ្សេលេនស្គី លោកប្រមុខអង្គការ​​ NATO លោក Mark Rutte បាននិយាយថាមិនទាន់មានភស្តុតាងគ្រប់គ្រាន់អាចបញ្ជាក់ថាកងទ័ពកូរ៉េខាងជើងកំពុងប្រយុទ្ធ នៅអ៊ុយក្រែននោះទេ ប៉ុន្តែអ្វីដែលគេដឹង នោះគឺថាកូរ៉េខាងជើងកំពុងគាំទ្ររុស្ស៉ី៕