(ភ្នំពេញ)៖ ក្មេងទំនើង៤នាក់ ដែលបានប្រើប្រាស់អំពើហិង្សាដាក់គ្នាទៅវិញទៅមកនៅមូលដ្ឋានសង្កាត់បឹងកក់ទី២ ខណ្ឌទួលគោក រាជធានីភ្នំពេញ ត្រូវបានអធិការដ្ឋាននគរបាលខណ្ឌទួលគោក សហការជាមួយការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញស្រាវជ្រាវចាប់ខ្លួន។

របាយការណ៍របស់ស្នងការដ្ឋាននគរបាលរាជធានីភ្នំពេញ ដែលបណ្ដាញព័ត៌មាន Fresh News ទទួលបាននៅថ្ងៃទី២៤ ខែមករា ឆ្នាំ២០២៥នេះ បានឲ្យដឹងថា ប្រតិបត្តិការបង្ក្រាបក្រុមក្មេងទំនើងទាំង៤នាក់នេះ ធ្វើឡើងនៅថ្ងៃទី២៣ ខែមករាម្សិលមិញ ដោយឃាត់ខ្លួនជាក់ស្ដែងនៅនឹងកន្លែងកើតហេតុបាន២នាក់ និងស្រាវជ្រាវបន្តឃាត់ខ្លួន២នាក់ ស្ថិតនៅចំណុចលើដងផ្លូវម៉ុងឬទ្ធី សង្កាត់ភ្នំពេញថ្មី ខណ្ឌសែនសុខ។

ជនសង្ស័យទាំង៤នាក់រួមមាន៖ ឈ្មោះ យឹម បញ្ញារាជសីហ៍ អាយុ១៨ឆ្នាំ, ទី២៖ឈ្មោះ រ៉ូន រ៉ូណាន់ អាយុ១៨ឆ្នាំ, ទី៣៖ឈ្មោះ សៀងហយ សុភត្រា អាយុ១៧ឆ្នាំ និងទី៤ឈ្មោះ សែន សុខសាន្ត អាយុ១៦ឆ្នាំ។ វត្ថុតាងចាប់យកមាន មួកការពារសុវត្ថិភាពចំនួន៣ (ជារបស់ជនសង្ស័យប្រើវាយ និងគប់គ្នាទៅវិញទៅមកនៅពេលកើតហេតុ), ម៉ូតូ១គ្រឿងម៉ាក Honda C125 ស៊េរី2024 ពណ៌ខ្មៅ ពាក់ផ្លាកលេខភ្នំពេញ1JV-4160។

បច្ចុប្បន្នជនសង្ស័យខាងលើ កំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីធ្វើការសាកសួរ និងចាត់ការបន្តតាមនីតិវិធី៕