(វ៉ាស៉ីនតោន)៖ កាលពីថ្ងៃព្រហស្បតិ៍ ទី២៣ ខែមករា ប្រធានាធិបតីអាមេរិក លោក ដូណាល់ ត្រាំ បាននិយាយថា រូបលោកចង់ជួប​ប្រធានាធិបតីរុស្ស៉ី លោក វ៉្លាឌីមៀ ពូទីន ឱ្យបានឆាប់បំផុតតាមតែអាចទៅរួច ដើម្បីធានាឱ្យបាននូវការបិទបញ្ចប់សង្រ្គាមអ៊ុយក្រែន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

តាំងតែពីមុនពេលទទួលជ័យជម្នះ ក្នុងការបោះឆ្នោតប្រធានាធិបតីអាមេរិក កាលពីខែវិច្ឆិកា ឆ្នាំ២០២៤ទៅទៀត លោក ត្រាំ ធ្លាប់​បានប្រកាសជាច្រើនសាថា រូបលោកនឹងសម្រេចបាន កិច្ចព្រមព្រៀង សម្រាប់សង្រ្គាមរវាងរុស្ស៉ីនិងអ៊ុយក្រែន អំឡុងប៉ុន្មានថ្ងៃដំបូង ក្រោយចូលកាន់អំណាច ប៉ុន្តែឥឡូវនេះ ក្រុមទីប្រឹក្សារបស់លោក បានទទួលស្គាល់ថា សង្រ្គាមនោះ នឹងត្រូវចំណាយពេលរាប់ខែ ដើម្បីអាចរកទីបញ្ចប់បាន។

លោក ត្រាំ បាននិយាយថា រូបលោក ពិតជាចង់ជួបលោក ពូទីន ឱ្យបានឆាប់ ដើម្បីអាចបញ្ចប់សង្រ្គាម ហើយលោកត្រៀមខ្លួនរួចជាស្រេច ដើម្បីធ្វើបែបនោះ។ លោកប្រធានាធិបតីអាមេរិក បានបន្តថា ពីមួយថ្ងៃទៅមួយថ្ងៃ ដែលលោក និង លោក ពូទីន មិនទាន់បានជួបគ្នា គឺកងទ័ពត្រូវបន្តពលីជីវិត នៅលើសមរភូមិ។ បើតាមលោក ត្រាំ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ក៏បានប្រាប់លោកដែរថា រូបលោកត្រៀមលក្ខណៈជាស្រេច ដើម្បីសម្រេចឱ្យបាន កិច្ចព្រមពៀងបញ្ចប់សង្រ្គាម។

គួរបញ្ជាក់ថា ភ្លាមៗក្រោយវិលត្រឡប់មកកាន់អំណាច ក្នុងសប្តាហ៍នេះ លោក ត្រាំ បានគំរាមដាក់ទណ្ឌកម្មក្នុងកម្រិតកាន់តែធ្ងន់ ទៅលើរុស្ស៉ី ប្រសិនបើលោក ពូទីន មិនព្រមចរចា លើបញ្ហាសង្រ្គាមអ៊ុយក្រែន។ មកទល់ពេលនេះ សង្រ្គាមអ៊ុយក្រែន បានអូសបន្លាយជិត៣ឆ្នាំហើយ ក្រោយផ្ទុះឡើងកាលពីខែកុម្ភៈ ឆ្នាំ២០២២៕