កើតក្នុងគ្រួសារជីវភាពមធ្យមយុវជន ឈួន ប្រសិទ្ធ រៀនបានត្រឹមថ្នាក់ទី១២ នៃវិទ្យាល័យសិរីមង្គលខេត្តកណ្ដាល។ ក្ដីស្រមៃចង់រៀន IT នៅសាកលវិទ្យាល័យក្នុងទីក្រុងភ្នំពេញក៏កើតមានឡើង ប៉ុន្តែដោយសារជីវភាពគ្រួសារមានកម្រិត គោលបំណងមួយនេះត្រូវកប់ចោល ហើយគេសម្រេចចូលហ្វឹកហាត់និងលេងបាល់ទះ នៅក្លឹបក្រសួងមហាផ្ទៃ។
ទាក់ទងនឹងចំណង់រៀនត ប្រសិទ្ធ បានឱ្យដឹងថា ៖<<ខ្ញុំធ្លាប់គិតចង់រៀន IT តែម៉ាក់ប៉ាខ្ញុំប្រាប់ថា អត់មានលទ្ធភាពឱ្យកូនរៀនទេ ចប់ថ្នាក់ទី១២ហ្នឹងឱ្យទៅហាត់ (បាល់ទះ) ជាមួយបងហើយ ហើយគាត់ថាទៅហាត់ទៅ ល្អអីគេដាក់ចូលក្របខ័ណ្ឌប៉ូលិស បានជួយកាត់បន្ថយបន្ទុកគ្រួសារផង>>។
ដោយមើលឃើញពីភាពខ្វះខាតជាក់ស្ដែង ក្នុងឆ្នាំ២០១៧ យុវជនវ័យ២៣ឆ្នាំ ក៏បានទៅហ្វឹកហាត់បាល់ទះជាមួយបងប្រុសបង្កើត ដែលជាកីឡាករនៅក្លឹបក្រសួងមហាផ្ទៃ ប៉ុន្តែពេលនេះលោកបានឈប់ពីកីឡាហើយ។
ដោយការប្រឹងប្រែងមិនរាថយទីបំផុត យុវជនកូនទី៤ក្នុងចំណោមបងប្អូន៥នាក់ រស់នៅភូមិរកាកោង ឃុំរកាកោង១ ស្រុកមុខកំពូល ខេត្តកណ្ដាល ទទួលបានក្របខ័ណ្ឌមន្ត្រីប៉ូលិសនៅឆ្នាំ២០១៩ ដែលអាចជួយសម្រួលបន្ទុកគ្រួសារបានខ្លះៗដែរ។
ងាកទៅការហ្វឹកហាត់ដំបូងវិញ ប្រសិទ្ធ បានជ្រើសរើសយកតំណែងការពារ (លីប៊័ររ៉ូ) ដែលជាតួនាទីមួយពិបាកគួរសម ដ្បិតរូបគេស្ទើរកម្លាំង ស្ទើរបច្ចេកទេស ហើយត្រូវលោត ត្រូវផ្លុង ត្រូវលូន ពេលខ្លះប្រសិទ្ធក៏មានកូនចិត្តចង់ឈប់ដែរ ប៉ុន្តែដោយមានរៀមច្បងណែនាំ គេក៏ខិតខំបន្តក្លាយជាកីឡាករល្អមួយរូបប្រចាំក្លឹប។
ទោះបីជាយ៉ាងណា ក្នុងការប្រកួតផ្លូវការម្ដងៗ ឈួន ប្រសិទ្ធ គឺជាលីប៊័ររ៉ូជម្រើសទី២ បន្ទាប់ពីកីឡាករ លាង ហុង។ ក្រៅពីជំនាញការពារ យុវជនកម្ពស់ ១,៧៩ម៉ែត្រ ក៏ពូកែវាយសេវាលោតស្ទើរប្រអប់ (ដើរ) ដែលមានការសរសើរពីមិត្តរួមក្រុម៕
អត្ថបទ៖ អ៊ុំ សុភក្តិ
News Source: news.sabay.com.kh