ព័ត៌មានថ្មីបំផុតទាក់ទងនឹងជំងឺកូវីដ ១៩ បានឲ្យឃើញថា ពិភពលោកទាំងមូលបានមានចំនួនអ្នកឆ្លងវីរុសនេះចំនួន ១០,២លាននាក់ និងអ្នកស្លាប់ជាង កន្លះលាននាក់។ គិតត្រឹមព្រឹកថ្ងៃទី ២៩ ខែមិថុនា ចំនួនអ្នកឆ្លងវីរុសកូវីដ ១៩ នៅតែបន្តកើនឡើងជាលំដាប់ ដោយប្រទេសមួយចំនួនសឹងតែទប់នឹងជំងឺនេះមិនរួច។
យោងតាមទិន្នន័យរបស់ Worldometers ពេលបច្ចុប្បន្ន ចំនួនអ្នកឆ្លងជំងឺខាងលើគឺប្រមាណជាង ១០,២លាននាក់ និងអ្នកស្លាប់បានកើនដល់ជាង ៥០ម៉ឺន ៣ពាន់ នាក់ (៥០៣,៩៨៥នាក់) និងអ្នកដែលជាសះស្បើយ ចំនួន ជាង ៥លាននាក់ (៥.៥៤៦.៤៤៩នាក់)។ ជំងឺបានរាតត្បាតដល់ ២១៣ ប្រទេសហើយ។
ក្នុងមួយម៉ោង មានអ្នកស្លាប់ ១៩៦នាក់ និង មានអ្នកស្លាប់ ១នាក់ បើគិតជារៀងរាល់ ១៨វិនាទី។បណ្ដាញព័ត៌មាន Reuters បានបន្ថែមថា ១ ភាគ ៤នៃអ្នកឆ្លងជំងឺសរុបគឺមកពីសហរដ្ឋអាមេរិក ដោយចំនួនអ្នកស្លាប់សរុបគឺ ជាង ១២ ម៉ឺននាក់ (១២៨,៤១២នាក់) ៕
ប្រភព៖ Kenh14 ប្រែសម្រួល៖ Caramel
News Source: news.sabay.com.kh