(ឌូបៃ)៖ Emirates Flight Catering (EKFC) ជាក្រុមហ៊ុនផ្គត់ផ្គង់ម្ហូបអាហារដ៏ធំបំផុតមួយរបស់ពិភពលោក ដែលក្រុមហ៊ុនអាកាសចរណ៍ Emirates គ្រប់គ្រងភាគហ៊ុន៩០ភាគរយ និងភាគហ៊ុនដែលនៅសេសសល់ ១០ភាគរយកាន់កាប់ដោយ Dubai Airports Corporation។ ឧស្សាហកម្មអាហារនេះ មានមូលដ្ឋាននៅក្នុងទីក្រុងឌូបៃ សហព័ន្ធអេមីរ៉ាតអារ៉ាប់រួម ជាប់នឹងអាកាសយាន្តដ្ឋានអន្តរជាតិឌូបៃតែម្តង។

ក្នុងដំណើរទស្សនកិច្ចរបស់ប្រតិភូព័ត៌មានរបស់កម្ពុជា ដែលមានអង្គភាព Fresh News ទូរទស្សន៍ PNN និង Kiripost ទៅកាន់ទីក្រុងឌូបៃ នាចុងខែមីនាកន្លងទៅនេះ ពួកយើងត្រូវបាន អនុញ្ញាតឱ្យចូលធ្វើទស្សនកិច្ច ស្វែងយល់យ៉ាងស៉ីជម្រៅអំពីដំណើរការនៃខ្សែច្រវាក់ផលិតកម្មអាហារ (F&B) នៅ EKFC ។

ដើម្បីអាចចូលធ្វើទស្សនកិច្ចក្នុងរោងចក្រផលិតអាហារដ៏ធំសម្បើមនេះបាន ពួកយើងត្រូវគោរពតាមក្រមប្រតិបត្តិ ដែលត្រូវកំណត់យ៉ាងតឹងរឹងរបស់ក្រុមហ៊ុននេះ។ ដំបូងពួកយើងបំពេញទម្រង់បែបបទសុខភាព ដើម្បីប្រាកដថាពួកយើងមានសុខភាពល្អ ហើយមិនត្រូវមានភ្ជាប់ជាមួយខ្លួននូវសណ្តែកនោះឡើយ បន្ទាប់ មកពួកហើយ ត្រូវឆ្លងកាត់នូវការស្កេនពិនិត្យពីសំណាក់ក្រុមសន្តិសុខ ទើបបន្តទៅពាក់អាវដូចជាអាវ ពេទ្យ ពាក់មួកគ្របសក់ ការពារកុំឱ្យជ្រុះសក់មកក្រៅ ដែលគ្រប់បុគ្គលិកទាំងអស់សុទ្ធតែពាក់វាដូចពួកយើងដែរ បន្ទាប់មកទៀតពួកយើងក៏តម្រូវឱ្យពាក់ស្បែកជើងសុវត្ថិភាព ដើម្បីកុំឱ្យរអិល ពេលធ្វើដំណើរ ទស្សនកិច្ចនៅ ចង្ក្រានបាយចម្អិនអាហារ។ ពួកយើងត្រូវបានទទួលយ៉ាងរាក់ទាក់ ពីសំណាក់បុគ្គលិកជាន់ខ្ពស់ ទៅតាមផ្នែក នីមួយៗ នៃឧស្សាហកម្មអាហារ និងបដិសណ្ឋារកិច្ចរបស់ EKFC ។

ជាមួយនឹងស្មាមញញឹម មេចុងភៅ Rury ជាជនជាតិឥណ្ឌូនេស៉ី លោកបានបម្រើការងារនៅ EKFC អស់រយៈពេល៧ឆ្នាំ ប៉ុន្តែលោកបានមករស់នៅទីក្រុងឌូបៃនេះ រយៈពេល២៤ឆ្នាំមកហើយ ឌូបៃប្រៀបបានជាផ្ទះទី២ របស់គាត់ដូច្នេះដែរ។

លោក Rury បានរៀបរាប់ប្រាប់ពួកយើងថា EKFC មានរៀបចំអាហារគ្រប់ថ្នាក់ទាំងអស់មាន First Class , Business Class និង Economy Class ក្រៅពីនេះ ក៏មានការផ្គត់ផ្គង់អាហារដល់ ក្រុមហ៊ុនអាកាសចរណ៍ជាង ១០០ក្រុមហ៊ុនផ្សេងទៀតដែលជាដៃគូ និងហោះហើរមកកាន់អាកាសយានដ្ឋានអន្តរជាតិឌូបៃ ដែលជា មជ្ឈមណ្ឌលអ្នកដំណើរឈានមុខគេរបស់ពិភពលោក។

បន្ថែមពីនេះអាហារដែលចម្អិននៅទីនេះ ក៏ត្រូវបាន ផ្គត់ផ្គង់នៅ Emirates Loung សម្រាប់អ្នកដំណើរអង្គុយរង់ចាំការឡើងយន្តហោះផងដែរ។

ក្នុងខ្សែច្រវាក់ផលិតកម្មរបស់ EKFC មានបុគ្គលិកចម្រុះជាតិសាសន៍ចំនួន ១២ ០០០នាក់ ក្នុងនោះមានមេចុង ភៅប្រហែល៥០០នាក់ដែលមានជំនាញមុខម្ហូរទៅតាមតំបន់។ ចង្ក្រានបាយដ៏ធំអស្ចារ្យប្រកបដោយ អនាម័យ នេះ បុគ្គលិកត្រូវបានបំពេញការងារដោយចែកចេញជាបីវេណក្នុងមួយថ្ងៃ ដែលអាចចម្អិនឈុតអាហារចំនួន ជាង ២០ម៉ឺនឈុត ។ នេះបើតាមប្រសាសន៍របស់មេចុងភៅ Rury។

បន្លែ ផ្លែឈើ សាច់ស្រស់ៗ និងគ្រឿងទេសគ្រប់មុខ ត្រូវបានសម្រិតសម្រាំងដ៏ល្អបំផុត ពីដៃគូសហការដែលមានកេរ្តិ៍ឈ្មោះល្បីល្បាញ ដើម្បីធានាបាននូវអាហារដែលមានឱជារស ផ្តល់នូវបទពិសោធន៍ និងការចងចាំល្អៗដល់អ្នកដំណើរគ្រប់រូប។

មេចុងភៅ Rury និយាយថា <<អាហារមិនមែនជាជំនាញទេ វាជាវិទ្យាសាស្ត្រ។ គ្រឿងផ្សំដែលប្រើប្រាស់ក្នុង ចង្ក្រាន្តបាយដ៏ធំមហិមារនេះ គឺសំខាន់ណាស់ សម្រាប់ម្ហូបអាហារ ចាំបាច់ត្រូវនាំចូលពីក្រុមហ៊ុនដែលមាន កេរ្តិ៍ឈ្មោះ និងមានគុណភាពខ្ពស់។ អាហារជួយឱ្យបទពិសោធន៍នៃការហោះហើររបស់យើង មានការចងចាំដ៏ល្អ ព្រោះនៅពេលដែលយើងជិះយន្តហោះ យើងតែងរំពៃគិតថា តើមានអ្វីហូប? បើយើងបានហូប អាហារឆ្ងាញ់ នោះយើងនឹងចងចាំវាមិនភ្លេច>>។

ឧស្សាហកម្មអាហារនៃ EKFC ក៏ប្រើប្រាស់បច្ចេកវិទ្យាសម្រាប់ជួយពន្លឿន និងជាជំនួយដល់ការងាររបស់ ចុងភៅផងដែរ ឧទាហរណ៍ដូចជាការកាត់នំ ដោយប្រើប្រាស់កម្លាំងទឹកជាដើម។ នៅពេលសួរថា តើនៅថ្ងៃ ខាងមុខបច្ចេកវិទ្យានឹងធ្វើការងារជំនួសចុងភៅ? លោក Rury និយាយថា <<មិនបានទេ ព្រោះការធ្វើម្ហូប ជាចំណង់ចំណូលចិត្តរបស់យើង មនុស្សធ្វើបានស្អាតជាង ល្អជាងម៉ាស៊ីន [បច្ចេកវិទ្យា] ម៉ាស៊ីនគ្រាន់តែជាជំនួយបន្ទាប់បន្សំប៉ុណ្ណោះ>>។

បើតាមការបញ្ជាក់របស់ចុងភៅ Rury ការផលិតអាហារត្រូវបានកំណត់ ៤ឈុតក្នុងមួយឆ្នាំៗ ដោយធ្វើការផលិតវិលជុំទៅតាមខែ។ អាហារដែលផលិតមួយថ្ងៃ សម្រាប់ផ្គត់ផ្គង់តែក្នុងមួយថ្ងៃប៉ុណ្ណោះ ដែលធានាបាននូវគុណភាពអាហារជូនភ្ញៀវ។

បន្ទាប់ពីបញ្ចប់ទស្សនកិច្ចផ្នែកផលិតអាហារ ប្រតិភូព័ត៌មានកម្ពុជា បានបន្តទស្សនកិច្ចទៅកាន់ផ្នែកផ្សេងទៀត ដូចជាផ្នែកវេចខ្ចប់ ដឹកជញ្ជូន រក្សាទុក ម្ហូបអាហារ ផ្នែករៀបចំសម្ភារៈប្រើប្រាស់សម្រាប់ធ្វើបដិសណ្ឋារកិច្ច ( ស្លាបព្រា ចាន កែវ…) ផ្នែកបោកអ៊ុតជាដើម ដោយបុគ្គលិកជាន់ខ្ពស់ផ្នែកនីមួយៗ បានពន្យល់ពួកយើងពីកិច្ចដំណើរការ និងការទទួលខុសត្រូវរបស់ក្រុមការងារគ្រប់ផ្នែក ដោយបំពេញការងារដោយយកចិត្តទុកដាក់ខ្ពស់ ធ្វើយ៉ាងណា ឱ្យម្ហូបអាហារ និងសម្ភារៈបដិសណ្ឋារកិច្ចទាំងនោះ បានទៅដល់ដៃអ្នកដំណើរទទួលបាននូវបទពិសោធន៍ល្អៗ មិនអាចបំភ្លេចបាន។

សូមជម្រាបថា Emirates Flight Catering (EKFC) ទទួលបានពានរង្វាន់ Airline Caterer of the Year សម្រាប់តំបន់មជ្ឈិមបូព៌ា រយៈពេល៩ឆ្នាំជាប់ៗគ្នា គិតមកត្រឹមឆ្នាំ២០២៤។ EKFC ត្រូវបានទទួលស្គាល់នូវគុណភាព សុវត្ថិភាពចចំណីអាហារ ISO 17025, EKFC FSSC22000, ISO 45001 និង ISO 9001 (2ds) និងពានរង្វាន់ចំណីអាហារសុវត្ថិភាពអន្តរជាតិជាច្រើនទៀត៕