(ភ្នំពេញ)៖ នៅក្នុងឱកាសទិវាគុណអ្នកម្ដាយ ឧកញ៉ា ឡេង និមល និងលោកស្រី ព្រមទាំងឧកញ៉ា ឡេង បញ្ចពណ៌ បានចុះជួបសំណេះសំណាលសួរសុខទុក្ខ និងលើកទឹកចិត្តជូនដល់ជីដូនចាស់ជរា ដែលស្នាក់អាស្រ័យនៅក្នុងមណ្ឌលមួយកន្លែង។

តាមរយៈវីដេអូខ្លីដែលបានបង្ហោះកាលពីថ្ងៃទី១១ ខែឧសភា ឆ្នាំ២០២៥ នៅលើផេកផ្លូវការរបស់ <<យុវជនបូជាការពារយុត្ដិធម៌>> បានបង្ហាញឱ្យឃើញពីភាពស្និទ្ធស្នាល គោរពស្រឡាញ់ បង្កើនភាពកក់ក្ដៅ និងភាពសប្បាយរីករាយពីសំណាក់ឧកញ៉ា ឡេង និមល និងឧកញ៉ា ឡេង បញ្ចពណ៌ រួមជាមួយនឹងក្រុមការងារ ជូនដល់ដូនចាស់ទាំងអស់នៅក្នុងមណ្ឌល ដោយលោកឧកញ៉ាបានរៀបចំធ្វើម្ហូប ដួសដាក់ចាន និងលើកជូនដូនចាស់ពិសារគ្រប់ៗគ្នា។ កាយវិការដ៏ប្រពៃថ្លៃថ្លានេះ បានបង្ហាញពីមនោសញ្ចាតនា ជាមួយការដឹងគុណ និងក្ដីស្រឡាញ់ចំពោះពលិកម្មគ្រប់បែបយ៉ាងរបស់ស្ត្រីដែលជាអ្នកម្តាយគ្រប់រូប។

ជាមួយនឹងភាពកក់ក្ដៅពោរពេញដោយអត្ថន័យកាត់ថ្លៃពុំបាននេះ លោកយាយទាំងអស់បានជូនពរឧកញ៉ា និងលោកស្រីឧកញ៉ា រួមជាមួយនឹងក្រុមការងារទាំងអស់ ទទួលបានសេចក្ដីសុខ រកស៊ីកាន់តែមានបាន និងមានសុភមង្គលជានិច្ចនៅក្នុងក្រុមគ្រួសារ។

សូមជម្រាបជូនថា នេះមិនមែនជាលើកទី១នោះទេសម្រាប់ឧកញ៉ា ក៏ដូចជាក្រុមការងារ <<យុវជនបូជាការពារយុត្ដិធម៌>> ដែលបានចែករំលែកក្ដីស្រឡាញ់ជូនដល់ចាស់ជរាទាំងនៅក្នុងមណ្ឌល ឬក្រៅមណ្ឌល ទាំងបងប្អូនប្រជាពលរដ្ឋទូទាំងប្រទេសដែលមានជីវភាពខ្វះខាត ក្រីក្រលំបាក គឺឧកញ៉ា និងលោកស្រីឧកញ៉ា តែងតែជួយជានិច្ច៕

https://www.facebook.com/share/v/1BV4HxZJdk/?mibextid=wwXIfr