(យូអិន)៖ ប្រមុខទីភ្នាក់ងារជនភៀសខ្លួន របស់អង្គការសហប្រជាជាតិ (UN) លោក Filippo Grandi កាលពីថ្ងៃសៅរ៍ ទី១៨ ខែមករា បានឱ្យដឹងថា ជនភៀសខ្លួនស៉ីរីសរុបជិត២០០ ០០០នាក់ បានវិលត្រឡប់ទៅប្រទេសកំណើតរបស់ពួកគេវិញ គិតចាប់​តាំងពីការដួលរលំ នៃរបបអតីតប្រធានាធិបតីស៉ីរី លោក Bashar al-Assad កាលពីដើមខែធ្នូ ឆ្នាំ២០២៤។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក Grandi បានបង្ហោះសារលើប្រព័ន្ធទំនាក់ទំនង X ថា ចន្លោះថ្ងៃទី៨ ខែធ្នូ ដល់ថ្ងៃទី១៦ ខែមករា ជនភៀសខ្លួនស៉ីរីចំនួនប្រហែល ១៩៥ ២០០នាក់ បានវិលត្រឡប់ទៅផ្ទះវិញ ហើយលោកបានបន្តថា ក្នុងពេលឆាប់ៗនេះ រូបលោកនឹងធ្វើទស្សនិច្ចទៅកាន់ប្រទេសស៉ីរី ព្រមទាំងបណ្តាប្រទេសជិតខាងដទៃទៀត ស្របពេលដែលទីភ្នាក់ងារ UNHCR របស់លោក បាននិងកំពុងខិតខំបង្កើនការគាំទ្ររបស់ខ្លួន។

កាលពីឆ្នាំមុន ប្រជាជនស៉ីរីរាប់សែននាក់ បានវិលត្រឡប់ទៅប្រទេសស៉ីរីវិញរួចជាស្រេច នៅពេលពួកគេរត់ចេញពីប្រទេសលីបង់ ដើម្បីគេច​ពីការវាយប្រហាររបស់អ៉ីស្រាអែល អំឡុងសង្រ្គាមជាមួយក្រុមសកម្មប្រយុទ្ធហេសបូឡា នាពេលនោះ។ ការវិលត្រឡប់ទាំងនោះ គឺកើតមានឡើង មុនពេលកងកម្លាំងក្រុមឧទ្ទាម បានផ្តួលរលំរបបលោក Assad នៅថ្ងៃទី៨ ខែធ្នូ ក្រោយសង្រ្គាមស៉ីវិលរយៈពេល​១៣ឆ្នាំ ដែលបានសម្លាប់មនុស្សជាងកន្លះលាននាក់ ហើយបង្ខំឱ្យរាប់លាននាក់ ត្រូវរត់ភៀសខ្លួនចេញទៅក្រៅប្រទេស។

គួរបញ្ជាក់ថា តួកគី ដែលមានព្រំប្រទល់ប្រវែងជិត១០០០គីឡូម៉ែត្រ ជាមួយស៉ីរី ជាប្រទេសដែលមានជនជាតិស៉ីរីជ្រកកោន ច្រើនជាងគេបង្អស់លើពិភពលោក គឺប្រហែល២.៩លាននាក់ ដែលបានរត់ភៀសខ្លួន ចាប់តាំងពីឆ្នាំ២០១១មក៕