(ក្រចេះ)៖ បុរសម្នាក់បានយកកាំបិតអាករសម្លាប់ប្រពន្ធ រួចចងកសម្លាប់ខ្លួនឯងតាមក្រោយ ដោយបន្សល់ទុកកូនប្រុសស្រី២នាក់ឲ្យនៅកំព្រា។ ហេតុការណ៍នេះ បានកើតឡើងនៅភូមិច្ររកដំបង ឃុំកំពង់ដំរី ស្រុកឆ្លូង ខេត្តក្រចេះ នៅព្រឹកថ្ងៃទី៩ ខែមករា ឆ្នាំ២០២៥។

ម្តាយជនរងគ្រោះឈ្មោះ ប៉ុល ណាង អាយុ៧២ឆ្នាំ បានប្រាប់សមត្ថកិច្ចថា កូនស្រីរបស់ខ្លួនបានទៅធ្វើការជាចុងភៅ នៅក្រុងបាវិត ខេត្តស្វាយរៀង បានរយៈពេល២ឆ្នាំហើយយ រីឯកូនប្រសារបានទៅធ្វើសំណង់ នៅឃុំត្រពាំងថ្លុង ស្រុកពញាក្រែក ខេត្តត្បូងឃ្មុំ។

នៅថ្ងៃទី៨ ខែមករា ឆ្នាំ២០២៥ កូនស្រីរបស់ខ្លួនបានមកលេងម្ដាយនៅផ្ទះកើតហើយខាងលើ រហូតដល់ថ្ងៃទី៩ ខែមករា ឆ្នាំ២០២៥។ ក្រោយមកគាត់ទៅជញ្ជាត់ត្រីនៅចំហៀងផ្ទះមានចម្ងាយប្រហែល៣០ម៉ែត្រ ស្រាប់តែឮសំឡេង ចៅៗស្រែកយំ ខ្លួនក៏រត់មកមើលស្រាប់តែឃើញចៅស្រែកយំនៅមុខបន្ទប់ក្រោមផ្ទះ ខ្លួនបើកបន្ទប់មើលឃើញកូនស្រីរបស់ខ្លួនដេកស្លាប់បាត់ទៅហើយ។ នៅពេលនោះ ក៏បានឃើញកូនប្រសារ មិនដឹងមកផ្ទះតាំងពីពេលណាទេ ហើយជិះម៉ូតូចេញពីផ្ទះពាក់អាវប្រលាក់ដោយឈាមចេញទៅបាត់។

លោកវរសេនីយ៍ឯក ឆុង តូរ៉ាន់ អធិការនគរបាលស្រុកឆ្លូង បានឲ្យដឹងនៅរសៀលថ្ងៃទី១០ ខែមករានេះថា ជនរងគ្រោះជាប្រពន្ធឈ្មោះ ទេស ម៉ានីន អាយុ៣១ឆ្នាំ មានទីលំនៅចំណុចអន្លង់ក្រវែន ភូមិច្រកដំបង ឃុំកំពង់ដំរី ស្រុកឆ្លូង ខេត្តក្រចេះ ចំណែកជនសង្ស័យដែលជាប្ដីមាន ឈ្មោះ ខ្នា និត អាយុ៣១ឆ្នាំ មុខរបរធ្វើចំការ មានទីលំនៅចំណុចអន្លង់ក្រវែន ភូមិច្ររកដំបង ឃុំកំពង់ដំរី ស្រុកឆ្លូង ខេត្តក្រចេះ។

ក្រោយធ្វើសកម្មភាពរួចជនសង្ស័យបានជិះម៉ូតូចេញពីផ្ទះកើតហេតុ ទៅចម្ការស្វាយចន្ទីដែលមានចម្ងាយ ប្រហែល៥គីឡូម៉ែត្រ ពីផ្ទះកើតហេតុ ហើយធ្វើអត្ដឃាតចងកសម្លាប់ខ្លួន កម្លាំងជំនាញអធិការដ្ឋាននគរបាលស្រុកឆ្លូង សហការមួយកម្លាំងជំនាញខេត្ត និងប៉ុស្តិ៍រដ្ឋបាលកំពង់ដំរី ចុះពិនិត្យស្រាវជ្រាវដល់កន្លែងកើតហេតុ សមត្ថកិច្ចសន្ឋិដ្ឋានថាករណី ឃាតកម្មខាងលើ និងធ្វើអត្ដឃាតចងកសម្លាប់ខ្លួន។

បើតាមកាសាកសួរស្រាវជ្រាវករណីនេះកើតឡើងដោយសារការប្រច័ណ្ឌប្រពន្ធ បច្ចុប្បន្នសាកសពទាំងពីរបានប្រគល់ជូនក្រុមគ្រួសារធ្វើបុណ្យតាមប្រពៃណី៕