(កំពង់ស្ពឺ)៖ ក្មេងទំនើងមួយក្រុមបាននាំគ្នាកាន់ដាវ ហើយថតវីដេអូបង្ហោះតាមបណ្ដាញសង្គម ត្រូវបានកម្លាំងនគរបាលស្រាវជ្រាវ និងឈានដល់ការចាប់ខ្លួនចំនួន៤នាក់ នៅស្រុកបសេដ្ឋ ខេត្តកំពង់ស្ពឺ។

របាយការណ៍របស់ស្នងការដ្ឋាននគរបាលខេត្តកំពង់ស្ពឺ ដែលបណ្ដាញព័ត៌មាន Fresh News ទទួលបាននៅព្រឹកថ្ងៃទី៣ ខែមករា ឆ្នាំ២០២៥នេះ បានឲ្យដឹងថា ក្រោយឃើញវីដេអូនោតាមបណ្ដាញសង្គមភ្លាម លោកឧត្តមសេនីយ៍ទោ ឃឹម សុកខៃ ស្នងការនគរបាលខេត្ត បានបញ្ជាកម្លាំងជំនាញក្រុងស្រុកទាំង៩ធ្វើការស្រាវជ្រាវជាបន្ទាន់។

រហូតនៅថ្ងៃទី២ ខែមករា ឆ្នាំ២០២៥ កម្លាំងអធិការដ្ឋាននគរបាលស្រុកបសេដ្ឋ សហការជាមួយប៉ុស្ដិ៍នគរបាលរដ្ឋបាលទាំង១៥ បានស្រាវជ្រាវ និងកំណត់បានមុខសញ្ញាក្រុមក្មេងទំនើងខាងលើ ចំនួន៤នាក់ ដើម្បីនាំខ្លួនមកសាកសួរនៅអធិការដ្ឋាននគរបាលស្រុក ចាត់ការបន្ដតាមនីតិវិធី។ ដោយឡែក ចំពោះបក្ខពួកផ្សេងទៀតកម្លាំងនគរបាលជំនាញកំពុងធ្វើការស្រាវជ្រាវ។

សូមជម្រាបថា វីដេអូដែលក្រុមក្មេងទំនើងនោះកាន់ដាវថតបង្ហោះតាមបណ្ដាញសង្គម គឺបានធ្វើឡើងកាលពីថ្ងៃទី២១ ខែធ្នូ ឆ្នាំ២០២៤ នៅតាមផ្លូវសាធារណៈមុខទីតាំងកាហ្វេមួយកន្លែងយីហោ កាហ្វេ២ជាន់ ស្ថិតនៅភូមិត្រពាំងឈូក ឃុំកក់ ស្រុកបសេដ្ឋ ខេត្តកំពង់ស្ពឺ៕