(កៀវ)៖ ប៉ូលិសប្រឆាំងអំពើពុករលួយរបស់អ៊ុយក្រែន បានកត់ត្រាឈ្មោះរដ្ឋមន្ត្រីកសិកម្ម លោក Mykola Solsky ជាជនសង្ស័យនៅក្នុងការស៉ើបអង្កេតឧក្រិដ្ឋកម្ម ជុំវិញករណីទិញយកដីរដ្ឋតម្លៃ ៧លានដុល្លារដោយខុសច្បាប់ ខណៈលោក Solsky បានបដិសេធនូវការចោទប្រកាន់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី២៤ ខែមេសា ឆ្នាំ ២០២៤។

លោក Solsky ដែលទទួលបន្ទុកលើឧស្សាហកម្មគ្រាប់ធញ្ញជាតិ ក្នុងសម័យសង្រ្គាមអ៊ុយក្រែន ចាប់តាំងពីខែមីនា ឆ្នាំ ២០២២មក បាននិយាយថា លោកមិនយល់ទេ ថាតើហេតុអ្វីបានជា ការចោទប្រកាន់ទាក់ទងនឹងព្រឹត្តិការណ៍ឆ្នាំ ២០១៧-២០១៨ បែរជាត្រូវប្រឈមនៅពេលនេះទៅវិញ។ បន្ទាប់ពីមានសេចក្តីថ្លែងការណ៍ របស់ការិយាល័យប្រឆាំងអំពើពុករលួយជាតិ ដែលរៀបរាប់លម្អិតអំពី ការរកឃើញនៅក្នុងការស៉ើបអង្កេតមួយ លោក Solsky បានប្រាប់ក្រុមអ្នកសារព័ត៌មានថា <<ខ្ញុំមិនយល់ស្របនឹងការចោទប្រកាន់នេះឡើយ>>។

គួរបញ្ជាក់ថា បើតាមការិយាល័យប្រឆាំងអំពើពុករលួយ រដ្ឋមន្រ្តីកសិកម្មបច្ចុប្បន្នរបស់អ៊ុយក្រែន លោក Solsky បានដឹកនាំគម្រោងមួយ ក្នុងគោលបំណងទទួលបានដីរដ្ឋដែលមានតម្លៃ ៧លានដុល្លារ និងព្យាយាមកាន់កាប់ដីដែលមានតម្លៃជិត ៥លានដុល្លារ។ របាយការណ៍ មិនបានបញ្ចេញឈ្មោះ លោក Solsky ទេប៉ុន្តែបានដាក់ការសង្ស័យលើ អតីតប្រធានាគណៈកម្មាធិការកសិកម្មនៃសភា ដែលជាមុខតំណែងរបស់ លោក Solsky មុនក្លាយជារដ្ឋមន្រ្តីកសិកម្មក្នុងខែមីនា ឆ្នាំ ២០២១៕