(មូស្គូ)៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្រកាសថា លោកនឹងពិនិត្យមើលបញ្ហាល្បឿនយឺត និងការរំខានមួយចំនួននៅលើ YouTube នៅក្នុងប្រទេសរុស្ស៊ី។ ការប្រកាសនេះ ធ្វើឡើងបន្ទាប់ពីមន្ត្រីភាពយន្តកំពូលរបស់រុស្ស៊ីបានលើកឡើងពីបញ្ហានេះ ជាមួយលោក ពូទីន ក្នុងជំនួបមួយកាលពីថ្ងៃព្រហស្បតិ៍។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី១៥ ខែវិច្ឆិកា ឆ្នាំ២០២៤។

អ្នករិះគន់ជឿជាក់ថា YouTube កំពុងត្រូវបានរំខានដោយចេតនាដោយអាជ្ញាធរ ដើម្បីរារាំងប្រជាជនពីការចូលមើលខ្លឹមសារ ដែលរិះគន់រដ្ឋាភិបាល និងសង្រ្គាមនៅអ៊ុយក្រែន។ ប៉ុន្តែ រុស្ស៊ីបានបដិសេធការចោទប្រកាន់នេះ ដោយអះអាងថា បញ្ហានេះបណ្តាលមកពី Google មិនបានធ្វើឱ្យប្រសើរឡើងនូវឧបករណ៍របស់ខ្លួន នៅក្នុងប្រទេសរុស្ស៊ី។

អ្នកនាំពាក្យវិមានក្រឹមឡាំង លោក Dmitry Peskov បានបញ្ជាក់ថា លោកពូទីន នឹងពិនិត្យមើលបញ្ហានេះ បន្ទាប់ពីមានការត្អូញត្អែរ ពីលោក Karen Shakhnazarov អ្នកគ្រប់គ្រងរោងកុន Mosfilm។ លោកបានបន្ថែមថា បញ្ហាល្បឿនយឺតអាចបណ្តាលមកពី Google មិនបានអនុវត្តតាមច្បាប់រុស្ស៊ី។

គួរបញ្ជាក់ថា YouTube គឺជាវេទិកាសំខាន់មួយសម្រាប់ក្រុមប្រឆាំងរុស្ស៊ី និងប្រព័ន្ធផ្សព្វផ្សាយឯករាជ្យក្នុងការផ្សព្វផ្សាយព័ត៌មាន និងទស្សនៈរបស់ពួកគេ។ រុស្ស៊ីត្រូវបានគេរិះគន់ ចំពោះការរឹតត្បិតសេរីភាពបញ្ចេញមតិ និងការបង្ក្រាបប្រព័ន្ធផ្សព្វផ្សាយឯករាជ្យ ជាពិសេសបន្ទាប់ពីការឈ្លានពានអ៊ុយក្រែន៕