(កណ្ដាល)៖ លោក ណុប រ័ត្ននិមល ជំនួយការសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកស្រី ហ៊ីង សុខលាភ តំណាងនាយឧត្តមសេនីយ៍ កិត្តិសង្គហបណ្ឌិត ហ៊ីង ប៊ុនហៀង និងលោក ជំទាវ ប៉ែន ចន្ទី ព្រមទាំងនាយទាហាន ពលទាហាន បញ្ជាការដ្ឋានអង្គរក្ស និងប្រជាពលរដ្ឋចំណុះជើងវត្តជាច្រើនទៀត បាននាំយកស្បង់ត្រ័យជីវរ ដង្ហែអង្គកឋិនទានទៅវេរប្រគេនព្រះភិក្ខុសង្ឃគង់ចាំព្រះវស្សា អស់កាលត្រីមាស នៅវត្តវិហារបិទមាស ស្ថិតក្នុងឃុំសៀមរាប ស្រុកកណ្តាលស្ទឹង ខេត្តកណ្តាល នាព្រឹកថ្ងៃទី១៥ ខែវិច្ឆិកា ឆ្នាំ២០២៤នេះ។

ក្នុងឱកាសដង្ហែអង្គកឋិនទាននេះ លោក ណុប រ័ត្ននិមល បានថ្លែងថា ដោយសារសន្តិភាព ទើបបានធ្វើបុណ្យទាន ហើយយើងមានលទ្ធភាពក្នុងការកសាង និងអភិវឌ្ឍន៍ប្រទេសជាតិ ឲ្យមានការរីកចម្រើនលើគ្រប់វិស័យ នៅទូទាំងប្រទេស នៅសព្វថ្ងៃនេះ។

លោកបានបន្តថា ក្រោមការដឹកនាំដ៍ត្រឹមត្រូវរបស់គណបក្សប្រជាជន និងរាជរដ្ឋាភិបាល ដែលមានសម្ដេចបវរធិបតី ហ៊ុន ម៉ាណែត នាអាណត្តិទី៧នេះ បានធ្វើឲ្យប្រទេសជាតិ មានសុខសន្តិភាព និងការអភិវឌ្ឍលើគ្រប់វិស័យ ក្នុងនោះ ប្រជាពលរដ្ឋរស់នៅយ៉ាងសុខសាន្តប្រកបមុខរបរចិញ្ចឹមជីវិតដោយសេរី មានការសាមគ្គីគ្នាជាធ្លុងមួយឯកភាពជាតិ ខ្មែរជួយខ្មែរយ៉ាងសុខដុមរមនាផ្ដល់តែភាពញញឹមមានសុភមង្គលគ្រប់ក្រុមគ្រួសារក្រោមម្លប់សន្តិភាពសម្ដេចតេជោសែន។

លោក ណុប រ័ត្ននិមល បានអំពាវនាវដល់ប្រជាពលរដ្ឋ និងមន្រ្តីរាជការ ឃុំសៀមរាប ស្រុកកណ្តាលស្ទឹង ខេត្តកណ្តាល កុំចាញ់ការញុះញង់របស់ជនអគតិ ហើយត្រូវបន្តចូលរួមជាមួយរាជរដ្ឋាភិបាល ក្នុងការការពារថែរក្សាសុខសន្តិភាព និងការកសាងអភិវឌ្ឍជាតិ។

ក្នុងឱកាសនោះ លោក ណុប រ័ត្ននិមល និងលោកស្រី ហ៊ឹង សុខលាភ បានវេរប្រគេនបច្ច័យសង្កត់ត្រ័យអង្គកឋិនទាន របស់នាយឧត្តមសេនីយ៍ កិត្តិសង្គហបណ្ឌិត ហ៊ីង ប៊ុនហៀង និងលោកស្រី ប៉ែន ចន្ទី មានចំនួន ៥០លានរៀល និងបច្ច័យអមត្រ័យរបស់ពុទ្ធបរិស័ទ្ធ ៥១លានរៀល និង៤ពាន់ដុល្លា សរុបបច្ច័យមាន ១០១លានរៀល និង ៤ពាន់ដុល្លារ។

ជាមួយគ្នានេះ លោកនិងលោកស្រី បាននាំយកអំណោយដ៏ថ្លៃថ្លារបស់សម្តេចធិបតី ហ៊ុន ម៉ាណែត និងលោកជំទាវបណ្ឌិត ចែកជូនតាជីយាយជី អាជ្ញាធរដែនដី និងកងកម្លាំងមានសមត្ថកិច្ចជាច្រើនទៀតផងដែរ៕