(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ គ្រោងនឹងធ្វើការសន្ទនាតាមទូរស័ព្ទជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន នៅថ្ងៃព្រហស្បតិ៍នេះ​(ម៉ោងនៅវ៉ាស៊ីនតោន) ដែលគេរំពឹងថា នឹងបន្តដោយកិច្ចសន្ទនាមួយទៀតជាមួយប្រធានាធិបតីអ៊ុយក្រែន លោក Volodymyr Zelenskyy នៅថ្ងៃសុក្រ។ នេះបើយោងតាម ទីភ្នាក់ងារសារព័ត៌មាន Reuters នៅថ្ងៃទី៣ ខែកក្កដា ឆ្នាំ២០២៥។

កិច្ចសន្ទនាការទូតដ៏មមាញឹកនេះ កើតឡើងក្រោយការសម្រេចចិត្តរបស់អាមេរិកក្នុងការផ្អាកការដឹកជញ្ជូនអាវុធសំខាន់ៗទៅឲ្យអ៊ុយក្រែន។

ការសម្រេចចិត្តរបស់មន្ទីរបញ្ចកោណក្នុងការផ្អាកការដឹកជញ្ជូនមីស៊ីលការពារដែនអាកាស Patriot និងអាវុធសំខាន់ៗផ្សេងទៀត ដោយសារតែការព្រួយបារម្ភពីការថយចុះស្តុករបស់សហរដ្ឋអាមេរិកផ្ទាល់ បានបង្កឲ្យមានប្រតិកម្មយ៉ាងខ្លាំងពីទីក្រុងកៀវ។ កាលពីថ្ងៃពុធ អ៊ុយក្រែនបានកោះហៅបេសកជនអាមេរិក ដើម្បីព្រមានថា ទង្វើនេះនឹងធ្វើឲ្យសមត្ថភាពការពារខ្លួនរបស់អ៊ុយក្រែនចុះខ្សោយ ខណៈដែលរុស្ស៊ីកំពុងបង្កើនការវាយប្រហារ។

លោក ត្រាំ បានប្រកាសពីកិច្ចសន្ទនារបស់លោកជាមួយលោក ពូទីន តាមរយៈបណ្ដាញសង្គម ដោយមិនបានបញ្ជាក់ពីរបៀបវារៈ។ ដោយឡែក កាសែត Financial Times បានរាយការណ៍ថា កិច្ចសន្ទនារវាងលោក ត្រាំ និងលោក Zelenskyy នឹងផ្តោតដោយផ្ទាល់ទៅលើការផ្អាកជំនួយអាវុធ និងលទ្ធភាពនៃការលក់អាវុធនាពេលអនាគត។

គួរបញ្ជាក់ថា ការសន្ទនាជាប់ៗគ្នានេះ បានគូសបញ្ជាក់ពីគោលនយោបាយពីរស្របគ្នារបស់រដ្ឋបាលលោក ត្រាំ ដែលព្យាយាមទាំងគ្រប់គ្រងទំនាក់ទំនងជាមួយរុស្ស៊ី និងទាំងព្យាយាមសម្រួលទំនាក់ទំនងជាមួយអ៊ុយក្រែន ដែលជាសម្ព័ន្ធមិត្តកំពុងមានការព្រួយបារម្ភចំពោះការផ្លាស់ប្តូរជំហររបស់អាមេរិក៕