(ក្រចេះ)៖ នារសៀលថ្ងៃចន្ទ ១រោច ខែពិសាខ ឆ្នាំម្សាញ់ សប្តស័ក ព.ស.២៥៦៩ ត្រូវនឹង ថ្ងៃទី១២ ខែឧសភា ឆ្នាំ២០២៥នេះ ព្រះសិរីសម្ភារ៍ បណ្ឌិត អេង ផល្លា ព្រះរាជាគណ:កិត្តិយស នៃព្រះរាជាណាចក្រ​កម្ពុជា ព្រះអនុគណស្រុកសំបូរ ខេត្តក្រចេះ ព្រះនាយកកម្រងសាលា​ពុទ្ធិកបឋមសិក្សាសម្តេចអគ្គមហាសេនាបតីតេជោ ហ៊ុន សែន ស្រុក​សំបូរ​ និងជាព្រះចៅអធិការវត្តព្រះវិហារធំសសរ១០០ បានដឹកនាំ​សហ​ការីមន្ត្រីសង្ឃ ព្រះចៅអធិការទាំង ២៧វត្ត នៃសាលាអនុ​គណ​ស្រុក​សំបូរ ​និមន្ត​បង្សុកូលឧទ្ទិសមហាកុសលប្រគេនព្រះវិញ្ញាណក្ខន្ធ ព្រះ​វិមុត្តិញាណ គង់ សុខ ព្រះរាជាគណៈកិត្តិយស ព្រះគ្រូគង្គាឧទ័យ​សីលធម៌ ព្រះអនុគណស្រុកឆ្លូង ព្រះឧបជ្ឈាយ៍សង្ឃខេត្ត និងជាព្រះ​ចៅ​អធិការវត្តមុនីសាគរ (វត្តដងក្តោង)។

ព្រះវិមុត្តិញ្ញាណ គង់ សុខ ព្រះរាជាគណកិត្តិយស ព្រះគ្រូគង្គាឧទ័យ​សីល​ធម៌ ព្រះអនុគណស្រុកឆ្លូង ព្រះឧបជ្ឈាយ៍សង្ឃខេត្ត និងជាព្រះចៅ​អធិការ​វត្តមុនីសាគរ (វត្តដងក្ដោង) បានទទួលអនិច្ចធម្ម នៅថៃ្ងព្រហស្ប​តិ៍ ១២កើត ខែវិសាខ ឆ្នាំម្សាញ់ សប្ដស័ក ព.ស.២៥៦៨ ត្រូវនឹងថ្ងៃទី៨ ខែឧសភា ឆ្នាំ២០២៥ វេលាម៉ោង ១៖២៦នាទីរសៀល ដោយជរាពាធ ក្នុងព្រះជន្មាយុ ៨៨ព្រះវស្សា នៅវត្តមុនីសាគរ (វត្តដងក្ដោង) ស្រុកឆ្លូង ខេត្តក្រចេះ។

ព្រះសិរីសម្ភារ៍ បណ្ឌិត អេង ផល្លា ព្រមទាំងមន្ត្រីសង្ឃ និងព្រះចៅ​អធិ​ការ​ទាំង ២៧វត្ត នៃសាលាអនុ​គណ​ស្រុក​សំបូរ បានបង្ហាញនូវទឹក​ព្រះ​ទ័យសង្វេគសោកស្តាយ ស្រណោះអាឡោះអាល័យ ព្រមទាំងបាន​ចាត់​ទុកការអនិច្ចធម្មរបស់ ព្រះវិមុត្តិញ្ញាណ គង់ សុខ ជាការបាត់បង់ នូវឥស្សរសមណសង្ឃពហុស្សូតជាន់ខ្ពស់មួយព្រះអង្គរបស់សាសនា ដែលបានរួមចំណែកយ៉ាងសកម្មក្នុងការលើកស្ទួយតម្លៃ ព្រះពុទ្ធ​សាស​នា និងសង្គមជាតិ ប្រកបដោយស្មារតីទទួលខុសត្រូវខ្ពស់។ ក្នុងមួយ​ព្រះ​ជន្មរបស់ព្រះអង្គបានលះបង់កម្លាំង កាយពល និងបញ្ញាញាណ ក្នុងបុព្វហេតុព្រះពុទ្ធសាសនា សង្គមជាតិ ព្រមទាំងបានស្ថាបនានូវ​ស្នា​ព្រះហស្ថយ៉ាងច្រើនអនេកទាំងពុទ្ធចក្រ និងអាណាចក្រ ទុកសម្រាប់​បច្ឆាជនប្រើប្រាស់ជាធនធាន ក្នុងការរួមចំណែកអភិវឌ្ឍសង្គមជាតិ តទៅអនាគត។

ព្រះសិរីសម្ភារ៍ បណ្ឌិត អេង ផល្លា ព្រមទាំងមន្ត្រីសង្ឃ និងព្រះចៅ​អធិ​ការ​ទាំង ២៧វត្ត នៃសាលាអនុ​គណ​ស្រុក​សំបូរ សូមប្រគេននូវមហា​កុ​សល ប្រគេនព្រះវិញ្ញាណក្ខន្ធ ព្រះវិមុត្តិញ្ញាណ គង់ សុខ បានទៅកាន់​ទី​ឋានបរមសុខកុំបីឃ្លៀងឃ្លាតឡើយ៕