(បរទេស)៖ នាយកប្រតិបត្តិ (CEO) ក្រុមហ៊ុនបច្ចេកវិទ្យាមួយចំនួនបានទទួលយកប្រាក់ខែត្រឹមតែ ១ដុល្លារអាមេរិកប៉ុណ្ណេះ ដែល​និមិត្តរូបមួយនេះ​វា​ត្រូវបានបំផុតគំនិតឡើងចាប់តាំងពីឆ្នាំ១៩៩៧ តាមរយៈលោក Steve Jobs ដែលជាបិតាស្ថាបនិក Apple និងជាកំពូលមនុស្សដែលមាន​គំនិតច្នៃប្រឌិតខ្ពស់នៅក្នុងវិស័យបច្ចេកវិទ្យា។

គិតត្រឹមបច្ចុប្បន្ននេះ នាយកប្រតិបត្តិក្រុមហ៊ុនបច្ចេកវិទ្យាធំៗមួយចំនួនដូចជា លោក Mark Zuckerberg មេធំរបស់ Meta, លោក Larry Ellison មេធំរបស់ Oracle, លោក Larry Page និង Sergey Brin មេធំរបស់ Google, លោក Jack Dorsey ស្ថាបនិក X (អតីត Twitter) និងលោក Elon Musk មេធំ Tesla និង SpaceX គឺសុទ្ធតែទទួលយកប្រាក់ខែត្រឹមតែ ១ដុល្លារប៉ុណ្ណោះ។

តើហេតុអ្វីបានជាពួកគាត់សម្រេចចិត្តទទួលយកប្រាក់ខែត្រឹមតែ ១ដុល្លារអាមេរិក?តាមពិតទៅគឺមិនមែនមកពីពួកគាត់ជាអ្នកមានទ្រព្យសម្បត្តិច្រើន ឬជាម្ចាស់របស់ក្រុមហ៊ុននោះទេ​ ប៉ុន្តែវាមានហេតុផលជាច្រើនទៀតដូចជា៖

១) កត្តាពន្ធ

ប្រាក់បៀវត្សរ៍ ឬប្រាក់ខែគឺជាប្រាក់ចំណូលដែលតម្រូវឱ្យបង់ពន្ធ។ ដូច្នេះតួនាទីជានាយកប្រតិបត្តិគឺទទួលបានប្រាក់ខែខ្ពស់ ដែលតម្រូវឱ្យ​បង់​ពន្ធខ្ពស់ទៅតាមនឹងផងដែរ។ ដើម្បីគេចចេញពីការបង់ពន្ធនេះ ក្រុមហ៊ុន និងនាយកប្រតិបត្តិផ្ទាល់គឺបានអនុវត្តវិធីសាស្ត្រផ្សេងវិញ។

២) បង្កើតទំនុកចិត្ត និង​ជាយុទ្ធសាស្ត្រទីផ្សារ

នាយកប្រតិបត្តិក្រុមហ៊ុនភាគច្រើនគឺសុទ្ធតែជាស្ថាបនិកក្រុមហ៊ុន ដូច្នេះពួកគេទទួលយកប្រាក់ខែត្រឹមតែ ១ដុល្លារគឺចង់បង្ហាញឱ្យឃើញថា ពួកគេមានទ្រព្យសម្បត្តិច្រើន ហើយក្រុមហ៊ុនដែលពួកគេកំពុងកាន់គឺកំពុងតែដំណើរការល្អ និងជោគជ័យ។ ការធ្វើបែបនេះគឺដើម្បីបង្ហាញ​ដល់ម្ចាស់ភាគហ៊ុន និងវិនិយោគិនមានទំនុកចិត្ត។ មួយវិញទៀតវាគឺជាយុទ្ធសាស្ត្រទីផ្សារដើម្បីបង្ហាញដល់​គូរប្រជែងឱ្យបានឃើញថា ក្រុមហ៊ុន​របស់ពួកគេគឺកំពុងនាំមុខ ឬកំពុងតែរីកចម្រើន។

៣) យុទ្ធសាស្ត្រ និងទំនាក់ទំនងផ្ទៃក្នុង

ការទទួលយកប្រាក់ខែត្រឹមតែ ១ដុល្លារគឺជាយុទ្ធសាស្ត្រផ្នែកធនធានមនុស្សមួយដ៏សំខាន់។ វាបង្ហាញពីការដាក់ខ្លួន ការលះបង់ ការ​ប្ដេជ្ញាចិត្ត​ចំពោះក្រុមហ៊ុន ជាពិសេសបើសិនជានៅក្នុងអំឡុងពេលដែលក្រុមហ៊ុនជួបវិបត្តិទៀតនោះ គឺនាយកប្រតិបត្តិនឹងក្លាយជាវីរៈបុរសភ្លាម។ ការធ្វើ​បែបនេះវាក៏បង្ហាញពីភាពស្និទ្ធស្នាល ទំនុកចិត្តដល់បុគ្គលិក និងសាធារណៈផងដែរ។

៤) ប្ដូរជាមួយអត្ថប្រយោជន៍ជាច្រើន

ក្រៅពីប៉ុន្មានចំណុចខាងលើនេះ ការទទួលយកប្រាក់ខែត្រឹមតែ ១ដុល្លារពីសំណាក់នាយកប្រតិបត្តិគឺវាបានផ្លាស់ប្ដូរជាមួយនឹង​អត្ថប្រយោជន៍​ជាច្រើនផ្សេងទៀត។ ជាទូទៅសម្រាប់មុខតំណែងជានាយកប្រតិបត្តិ​របស់ក្រុមហ៊ុនលោកខាងលិច គឺតែងតែទទួលបានមកវិញនូវ​ភាគហ៊ុន ភាគលាភ ប្រាក់រង្វាន់ ប្រាក់លើកទឹកចិត្ត និង​ប្រាក់ឧបត្ថម្ភផ្សេងៗជាច្រើនក្នុងខ្ទង់រាប់ពាន់លានដុល្លារ ដែលប្រាក់ទាំងនោះភាគច្រើនគឺមិនជាប់ពន្ធ។

សរុបមកការទទួលយកប្រាក់ខែត្រឹមតែ ១ដុល្លាររបស់នាយកប្រតិបត្តិគឺបង្ហាញពីយុទ្ធសាស្រ្តពន្ធ ការលើកទឹកចិត្ត ការលះបង់ និង​ទំនុកចិត្ត ប៉ុន្តែវាក៏ប្ដូរមកវិញនូវ​អត្ថប្រយោជន៍ដ៏ច្រើនសន្ធឹកផងដែរ៕