(កំពង់ធំ)៖ លោក សាយ គឹមឡម អភិបាលស្រុកស្ទោង ខេត្តកំពង់ធំ បានថ្លែងថា វិស័យពុទ្ធចក្រ និងអាណាចក្រ រីកចម្រើនរុងរឿងទៅបាន អាស្រ័យដោយសារកត្តាសុខសន្តិភាព។

លោកអភិបាលស្រុកស្ទោង បានថ្លែងដូច្នេះក្នុងឱកាសលោកនិងសហការីព្រមទាំងព្រះមន្ត្រីសង្ឃស្រុកស្ទោង អញ្ជើញ និងនិមន្តជាគណៈអធិបតី និងព្រះគណៈធិបតីក្នុងពិធីកាត់ខ្សែបូសម្ពោធឆ្លងរបង និងសមិទ្ធផលនានាក្នុងវត្តប្រាសាទស្វាយជ្រុំ នាថ្ងៃទី០២ ខែមេសា ឆ្នាំ២០២៥ ដែលស្ថិតនៅឃុំចំណាលើ ស្រុកស្ទោង ខេត្តកំពង់ធំ។

លោកបានបន្ថែមថា ព្រះពុទ្ធសាសនា ជាធាតុចូលសំខាន់ក្នុងការចូលរួមអភិវឌ្ឍសង្គម និងលើកកម្ពស់វិស័យអប់រំ ជាពិសេសព្រះពុទ្ធសាសនាបានអប់រំយុវជន យុវនារី ឱ្យងាកមកចាប់អារម្មណ៍នឹងការសិក្សារៀនសូត្រ មានសីលធម៌ គុណធម៌ និងប្រកបដោយ ពុទ្ធិខ្ពស់ ក្នុងការរស់នៅ ដើម្បីក្លាយជាទំពាំងដ៏រឹងមាំតបស្នងដល់សង្គមជាតិមាតុភូមិ។

លោកបានបន្តថា សមិទ្ធផលថ្មីៗដែលកើតឡើងទាំងនេះ បានបង្ហាញអំពីការរីកចម្រើនទាំងផ្នែកពុទ្ធចក្រ និងអាណាចក្រ ដោយការរីកចម្រើនទាំងនេះ បានមកពីការលះបង់សាច់ស្រស់ ឈាមស្រស់ របស់សម្ដេចអគ្គមហាសេនាបតីតេជោហ៊ុន សែន និងឥស្សរជនឆ្នើមជាច្រើនរូបទៀត ដែលខិតខំរកសន្តិភាព និងឯកភាពជាតិខ្មែរ គួបផ្សំនឹងការដឹកនាំដ៏ឈ្លាសវៃរបស់សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

បន្ថែមពីនេះ លោកបានជម្រាបដល់បងប្អូនប្រជាពលរដ្ឋ លោកយាយលោកតា ទាំងអស់គិតគូរខ្ពស់អំពីអនាម័យ និងសុខភាព ទាំងផ្លូវកាយនិងផ្លូវចិត្ត ហើយអាជ្ញាធរមូលដ្ឋាន ត្រូវតែគិតគូរអំពី សុខទុក្ខ សុខុមាលភាពបងប្អូនប្រជាពលរដ្ឋ និងសហការគ្នាឱ្យបានល្អរវាងមន្ត្រីរាជការ ដើម្បីចូលរួមចំណែកក្នុងការអភិវឌ្ឍមូលដ្ឋាន ឱ្យបានរីកចម្រើនជាបន្តបន្ទាប់។

ក្នុងឱកាសនោះដែរ លោកក៏បានអំពាវនាវដល់បងប្អូនប្រជាពលរដ្ឋទាំងអស់សូមរួមចំណែកក្នុងការការពារបរិស្ថាន ធនធានធម្មជាតិផ្សេងៗ និងចូលរួមដាំដើមឈើឱ្យបានច្រើន ដើម្បីការពារបរិស្ថាន ពីគ្រោះធម្មជាតិគ្រប់ប្រភេទ ដែលបង្កឱ្យមានមហន្តរាយ វិនាសកម្ម និងការខូចខាតសំណង់អគារ ផ្សេងៗជាយថាហេតុ។

លោកបានស្នើដល់អាជ្ញាធរ ដែលពាក់ព័ន្ធសូមថែរក្សាសន្តិសុខ សណ្ដាប់ធ្នាប់ របៀបរៀបរយឱ្យបានខ្ពស់ ដើម្បីធានាបាននូវសុខសុវត្ថិភាពជូនបងប្អូនទាំងអស់គ្នា ក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរខាងមុខនេះ ហើយបងប្អូនទាំងអស់គ្នា សូមចូលរួមសង្ក្រាន្តរដ្ឋបាលស្រុកស្ទោងឱ្យបានច្រើនកុះករ ខណៈដែលរដ្ឋបាលស្រុកស្ទោងបានកំពុងនឹងបន្តការរៀបចំ តុបតែង លម្អស្ពានទាំងបី ដើម្បីជាទីចាប់អារម្មណ៍នៃភ្ញៀវទេសចរទាំងអស់។

គួរបញ្ជាក់ផងដែរថា គណៈធិបតីនិងព្រះគណអធិបតីបានចូលរួមបច្ច័យចំនួន ២ ៥៧០ ០០០រៀល ក្នុងពិធីបុណ្យនេះផងដែរ៕