(ភ្នំពេញ)៖ អតីតសកម្មជនអតីតបក្សសង្គ្រោះជាតិនៅអាមេរិក លោក ថាល់ សាវុធ បានសម្តែងការហួសចិត្តជាខ្លាំង ចំពោះទង្វើរបស់លោក សម រង្ស៊ី ដែល​បានប្រឹងសម្តែងធ្វើជាសង្វេគចំពោះមរណភាពរបស់លោក លិម គឹមយ៉ា ដោយសារការធ្វើឃាតនៅទីក្រុងបាងកក ប្រទេសថៃ។

ជាអតីតសកម្មជនអតីតបក្សសង្គ្រោះជាតិនៅសហរដ្ឋអាមេរិក លោក ថាល់ សាវុធ ក៏បានដឹងរឿងខ្លះពាក់ព័ន្ធទំនាក់ទំនងរវាងលោក សម រង្ស៊ី និង​លោក លិម គឹមយ៉ា នៅពេលគាត់នៅមានជីវិត។

លោក ថាល់ សាវុធ បានបញ្ជាក់ថា នៅពេលមានជីវិត លោក លិម គឹមយ៉ា អ្នក​នយោ​បាយមកពីក្រុមលោក កឹម សុខា មិនធ្លាប់មានទំនាក់ទំនងអ្វីឱ្យ​ជិតស្និទ្ធ​នោះឡើយជាមួយទណ្ឌិត សម រង្ស៊ី បើទោះបីរស់នៅបារាំង និង​មានសញ្ជាតិ​បារាំងដូចគ្នា។ បន្ថែមពីលើនោះ នៅលើបណ្តាញសង្គម​ហ្វេស​ប៊ុក​ ​លោក លិម គឹមយ៉ា ក៏ធ្លាប់​បានវាយប្រហារលើនយោបាយរបស់ទណ្ឌិត សម រង្ស៊ី ផងដែរ។ មិនតែប៉ុណ្ណោះ លោក លិម គឹមយ៉ា មានទស្សនៈមិន​ត្រូវ​គ្នានោះឡើយ ជាមួយទណ្ឌិត សម រង្ស៊ី ហើយក៏ឧស្សាហ៍មានការខ្វែងគំនិត និងជម្លោះ​ជា​មួយ​គ្នាផងដែរ។

លោក ថាល់ សាវុធ ស្នើទៅក្រុមប្រឆាំងឱ្យបញ្ឈប់អាវប្បធម៌លាបព័ណ៌លើ​រាជ​រដ្ឋាភិបាល និងបក្សកាន់អំណាច រាល់ពេលមានបញ្ហាលើក្រុមប្រឆាំង។ សម្រាប់លោក ថាល់ សាវុធ ក៏មានទស្សនៈដូចមនុស្សជាច្រើនទៀតថា គ្មាន​ហេតុផលអ្វីដែលបក្សកាន់អំណាច និងរាជរដ្ឋាភិបាលកម្ពុជា សម្លាប់លោក លិម គឹមយ៉ានោះឡើយ ព្រោះមិនមានផលចំណេញអ្វីទាល់តែសោះ៕