(ភ្នំពេញ)៖ លោក Jeremy Zwinger ស្ថាបនិកសន្និសីទស្រូវអង្ករពិភព​លោក (World Rice Conference) គាំទ្រកម្ពុជាធ្វើជាម្ចាស់ផ្ទះរៀបចំ​សន្និ​សីទ​ស្រូវអង្ករពិភព​លោកសម្រាប់ឆ្នាំ២០២៥។

ការបញ្ជាក់បែបនេះ ធ្វើឡើងក្នុងពេលលោក Jeremy Zwinger ជួប​សម្តែងការគួរសម និងពិភាក្សាការងារជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នារសៀលថ្ងៃទី៨ ខែមករា ឆ្នាំ២០២៥នេះ នៅវិមានសន្តិភាព។

ក្នុងជំនួបនេះ លោក Jeremy Zwinger ដែលជាប្រធាន និងជា​នាយក​ប្រតិបត្តិក្រុមហ៊ុន The Rice Trader (TRT) បានសម្ដែងក្តីសោមនស្ស​រីករាយ និងកោតសរសើរចំពោះការអភិវឌ្ឍយ៉ាងឆាប់​រហ័សលើគ្រប់​វិស័យ​របស់កម្ពុជា ដែលក្នុងនោះវិស័យស្រូវអង្ករ, ឡូជីស្ទីក, និងហេដ្ឋារចនា​សម្ព័ន្ធ​ផ្សេងៗ មានការរីកចម្រើនគួរឱ្យកត់សម្គាល់ ព្រមទាំងបានបង្ហាញការ​ជឿជាក់​ប្រកបដោយសុទិដ្ឋិនិយមអំពីសក្ដានុពលរបស់កម្ពុជា។

លោកប្រធានក្រុមហ៊ុនក៏បានសម្ដែងការអបអរសាទរចំពោះកម្ពុជា ដែលបាន​ឈ្នះពានរង្វាន់អង្ករល្អបំផុតរបស់ពិភពលោក កាលពីខែវិច្ឆិកា ឆ្នាំ២០២៤ នាទី​ក្រុងម៉ានិល ប្រទេសហ្វីលីពីន និងបង្ហាញអំពីការគាំទ្រកម្ពុជា​ធ្វើជា​ម្ចាស់​ផ្ទះរៀបចំសន្និសីទស្រូវអង្ករពិភពលោក​ សម្រាប់ឆ្នាំ២០២៥នេះផងដែរ។ លោកប្រធានក្រុមហ៊ុន ក៏បានសម្ដែងក្តីសោមនស្សរីករាយ ដែលបានចូលរួម និងសហការជាមួយកម្ពុជា ក្នុងវិស័យស្រូវអង្ករ នាពេលកន្លងមក។

ជាការឆ្លើយតប សម្ដេចមហាបវរធិបតី បានថ្លែងអំណរគុណចំពោះ​លោក​ប្រធាន​ក្រុមហ៊ុន ដែលបានគាំទ្រកម្ពុជាក្នុងការធ្វើជាម្ចាស់ផ្ទះរៀបចំសន្និសីទ​ស្រូវអង្ករពិភពលោក សម្រាប់ឆ្នាំ២០២៥នេះ។ សម្ដេចមហាបវរធិបតី ក៏បាន​គូសបញ្ជាក់ផងដែរថា ដំណាំស្រូវ គឺជាដំណាំយុទ្ធសាស្ត្រយូរអង្វែង​របស់​កម្ពុជា ។

សម្ដេចប្រមុខរាជរដ្ឋាភិបាល បានគូសបញ្ជាក់ផងដែរ​អំពីការដាក់​ចេញគោល​នយោបាយចាំបាច់នានារបស់រាជរដ្ឋាភិបាល នៅក្នុងការគាំទ្រទៅដល់ផលិត​កម្មស្រូវអង្កររបស់កម្ពុជា ដើម្បីធានាឱ្យបាននូវភាពប្រកួតប្រជែង ក៏ដូចជា​ការ​អភិវឌ្ឍហេដ្ឋារចនាសម្ព័ន្ធ និងឡូជីស្ទីក សំដៅសម្រួលទៅដល់ការដឹកជញ្ជូន និងកាត់បន្ថយថ្លៃដើម៕