(គូឡាឡាំពួរ)៖ ឆ្មាំឆ្នេរសមុទ្រម៉ាឡេស៊ី បានប្រកាសនៅថ្ងៃសុក្រនេះថា ខ្លួនកំពុងបង្កើនការល្បាតទ្វេដង នៅក្នុងដែនទឹករបស់ខ្លួន ដើម្បីស្វែងរកទូកដែលដឹកជនចំណាកស្រុកមីយ៉ាន់ម៉ា ដែលគ្មានឯកសារ បន្ទាប់ពីអាជ្ញាធរបានឃាត់ខ្លួនជនចំណាកស្រុកជិត ២០០នាក់ នៅលើកោះមួយ ក្នុងរដ្ឋ Kedah ភាគពាយព្យនៃប្រទេស។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

ឆ្មាំឆ្នេរសមុទ្របានឱ្យដឹងថា ប៉ូលិសបានឃាត់ខ្លួនជនចំណាកស្រុកមីយ៉ាន់ម៉ា ដែលគ្មានឯកសារចំនួន ១៩៦ នាក់ នៅព្រឹកព្រលឹមថ្ងៃសុក្រ បន្ទាប់ពីទូករបស់ពួកគេបានមកដល់ឆ្នេរ នៅលើកោះរមណីយដ្ឋាន Langkawi។

ឆ្មាំសមុទ្របានបញ្ជាក់ក្នុងសេចក្តីថ្លែងការណ៍មួយថា <<ផ្អែកលើព័ត៌មានដែលឆ្មាំឆ្នេរសមុទ្របានទទួល មានទូកពីរបន្ថែមទៀតដែលដឹកជនចំណាកស្រុកមីយ៉ាន់ម៉ា ដែលគ្មានឯកសារនៅសមុទ្រ ប៉ុន្តែទីតាំងពិតប្រាកដរបស់ពួកគេនៅមិនទាន់ដឹងនៅឡើយ>>។

អគ្គនាយកឆ្មាំសមុទ្រម៉ាឡេស៊ី លោក Mohd Rosli Abdullah បានបញ្ជាក់ថា អាជ្ញាធរកំពុងល្បាតនៅដែនទឹកភាគខាងជើងនៃទីក្រុង Langkawi និងតំបន់ព្រំដែន ព្រមទាំងបានរៀបចំការឃ្លាំមើលតាមអាកាស ដើម្បីស្វែងរកទូកទាំងនោះ។ លោកបានបន្ថែមថា ឆ្មាំឆ្នេរសមុទ្រ ក៏កំពុងទាក់ទងជាមួយអាជ្ញាធរថៃ ដើម្បីតាមដានចលនារបស់ទូកទាំងនោះ។

គួរបញ្ជាក់ថា ម៉ាឡេស៊ី ដែល​មិន​ទទួល​ស្គាល់​ឋានៈ​ជនភៀសខ្លួន គឺជា​គោលដៅ​ពេញចិត្ត​សម្រាប់​ជនជាតិភាគតិច​រ៉ូហ៊ីងយ៉ា ដែល​រត់គេច​ពី​ការ​ធ្វើទុក្ខបុកម្នេញ​ក្នុង​ប្រទេស​មីយ៉ាន់ម៉ា ឬ​ជំរំ​ជនភៀសខ្លួន​ក្នុង​ប្រទេស​បង់ក្លាដែស។ ប៉ុន្តែ ក្នុងប៉ុន្មានឆ្នាំថ្មីៗនេះ ម៉ាឡេស៊ី បានចាត់វិធានការតឹងរ៉ឹង ដើម្បីទប់ស្កាត់ជនអន្តោប្រវេសន៍ខុសច្បាប់ រួមទាំងការបណ្តេញទូក និងការឃុំខ្លួនជនចំណាកស្រុក៕