(សេអុងណាំ)៖ នាយកដ្ឋានពន្លត់អគ្គីភ័យ បានរាយការណ៍ឱ្យដឹងថា អគ្គីភ័យយ៉ាងសន្ធោសន្ធៅបានឆាបឆេះអគារពាណិជ្ជកម្ម ៨ ជាន់មួយ ស្ថិតក្នុងទីក្រុង Seongnam ប្រទេសកូរ៉េខាងត្បូងនៅថ្ងៃសុក្រនេះ ដែលបណ្តាលឱ្យមនុស្ស ១២ នាក់ត្រូវបានបញ្ជូនទៅកាន់មន្ទីរពេទ្យ។

បើយោងតាមទីភ្នាក់ងារសារព័ត៌មាន Reuters បានគូសបញ្ជាក់ឱ្យដឹងថា ក្រុមអ្នកជួយសង្គ្រោះ ក៏បានជួយសង្គ្រោះមនុស្សប្រហែល ៣០ នាក់ផ្សេងទៀត ដែលបានជាប់នៅក្នុងអគារដោយសុវត្ថិភាពផងដែរ។

ចំណែកឯ ទូរទស្សន៍ YTN បានរាយការណ៍មុននេះថា មានមនុស្សជាច្រើននាក់ បានជាប់នៅខាងក្នុងអគារ ខណៈវីដេអូផ្សាយផ្ទាល់បានបង្ហាញពីផ្សែងខ្មៅយ៉ាងក្រាស់ ហុយចេញពីអគារ។

គួរបញ្ជាក់ថា មូលហេតុនៃអគ្គីភ័យនេះ មិនទាន់ត្រូវបានបញ្ជាក់ច្បាស់នៅឡើយទេ ប៉ុន្តែគ្រាន់តែដឹងថា អណ្តាតភ្លើងបានឆាបឆេះចេញពីភោជនីយដ្ឋានមួយនៅជាន់ផ្ទាល់ដីនៃអគារ ហើយបានរាលដាលយ៉ាងឆាប់រហ័ស ឡើងទៅជាន់ខាងលើ។ហេតុការណ៍នេះ បានបង្កឱ្យមានការភ័យស្លន់ស្លោនិងការជម្លៀសប្រជាពលរដ្ឋជាច្រើននាក់៕