(ភ្នំពេញ)៖ សម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជា បានថ្លែងថា បច្ចុប្បន្ននេះបើវៀតណាមមិនសប្បាយចិត្ត ទំនិញរបស់កម្ពុជាទាំងអស់ដឹកចេញតាមទន្លេមេគង្គអត់រួចទេ កម្ពុជានៅតែពឹងដង្ហើមគេដក ដូចជាអុកស៊ីហ្សែន ដែលត្រូវគេចង់ផ្តាច់ក៏ផ្តាច់ គេចង់ឱ្យក៏បាន តែបើបានសាងសង់ព្រែកជីកហ្វូណន-តេជោនេះរួចហើយ យើងនឹងអាចដឹកទំនិញចេញតាមទន្លេមេគង្គដោយខ្លួនឯង។

ថ្លែងនៅក្នុងឱកាសអញ្ជើញអធិបតីភាពដ៏ខ្ពង់ខ្ពស់ក្នុងពិធីពិសាអាហារសាមគ្គីមហាគ្រួសារ ឧកញ៉ាកម្ពុជានៅល្ងាចថ្ងៃទី២៦ ខែមេសា ឆ្នាំ២០២៤នេះ សម្តេចតេជោ ហ៊ុន សែន ក៏សូមទូន្មានទៅប្រទេសមួយចំនួន ដែលចាប់យកបញ្ហាព្រែកជីកហ្វូណន-តេជោ ដើម្បីប្រឆាំងនឹងកម្ពុជាសូមបញ្ឈប់ទៅ។

សម្តេចតេជោ បានរម្លឹកថា សម្តេចគោរពទៅដល់ព្រះរាជតម្រិះរបស់ព្រះបាទអង្គឌួង។ ជាក់ស្តែងផ្លូវជាតិលេខ៤១ របស់កម្ពុជា គឺជាផ្លូវអង្គឌួង ដែលធ្វើទៅកាន់មាត់សមុទ្រ ហើយព្រះអង្គក៏មានព្រះរាជតម្រិះជីកព្រែកជីកនេះដែរ ប៉ុន្តែធ្វើមិនបាន ឥឡូវដល់ជំនាន់យើងត្រូវតែធ្វើហើយ។

ពាក់ព័ន្ធនឹងការដឹកជញ្ជូនទំនិញតាមទន្លេមេគង្គនេះដែរ សម្តេចតេជោ ហ៊ុន សែន បានថ្លែងដូចនេះថា <<ខ្ញុំនិយាយដោយត្រង់បើវៀតណាមមិនសប្បាយចិត្ត ទំនិញកម្ពុជាទាំងអស់ដឹកចេញតាមទន្លេមេគង្គអត់រួចទេ ខ្ញុំសូមប្រាប់អ្នកទាំងអស់ឱ្យបានច្បាស់ បើមិនធ្វើព្រែកជីកនឹងទេ កម្ពុជានៅតែពឹងដង្ហើមគេដក ដូចអុកស៊ីហ្សែន ដែលត្រូវគេផ្តាច់ក៏ផ្តាច់ គេចង់ឱ្យក៏អោយ>>។

សម្តេចតេជោ ហ៊ុន សែន បានថ្លែងទៀតថា នេះក៏ជាសារដាស់តឿនចំពោះវៀតណាមថា មូលហេតុអីបានជាកម្ពុជាត្រូវសម្រេចធ្វើព្រែកជីកហ្វូណនតេជោនេះ, មូលហេតុគឺដោយសារវាលំបាកពេកហើយកម្ពុជាត្រូវបង់ថ្លៃការ, ប្រកួតប្រជែងរបស់យើងមិនឈ្នះគេនោះទេ ប៉ុន្តែបើបានព្រែកជីកហ្វូណន-តេជោនេះ ការប្រកួតប្រជែងរបស់យើងនឹងមានលក្ខណៈប្រហាក់ប្រហែល (ថ្លៃភ្លើង ថ្លៃដឹកជញ្ជូន ថ្លៃពលកម្ម) យើងអាចប្រកួតប្រជែងជាមួយគេបាន ប៉ុន្តែគ្រាន់តែយើងបង់ថ្លៃដឹកជញ្ជូនប្រគល់ទៅឱ្យវៀតណាមជាប្រចាំនោះទេ វាគ្រប់គ្រាន់ល្មមនឹងបាត់បង់នូវភាពប្រកួតប្រជែងរបស់កម្ពុជាហើយ។

សម្តេចតេជោ ហ៊ុន សែន បានបញ្ជាក់ជាថ្មីទៀតថា <<សុំឱ្យថ្នាក់ដឹកនាំវៀតណាមយល់ដល់ខ្ញុំដែលបង្ខំចិត្តត្រូវនិយាយដោយមូលហេតុថា មេដឹកនាំវៀតណាមមិនអាចគ្រប់គ្រងថ្នាក់ក្រោមបានទេ ហើយខ្ញុំក៏កាន់តែត្រូវ និយាយដោយសារជនក្បត់ជាតិចេញមកប្រឆាំងនឹងព្រែកជីកហ្វូណនតេជោ ខ្ញុំអំពាវនាវជនរួមជាតិកម្ពុជាគាំទ្រគម្រោងព្រែកជីកហ្វូណនតេជោ>>។

សូមជម្រាបថា គម្រោងព្រែកជីកហ្វូណន-តេជោ គឺជាគម្រោងតភ្ជាប់ផ្លូវទឹករវាងទន្លេ ទៅកាន់សមុទ្ររបស់កម្ពុជា ដោយឆ្លងកាត់ខេត្តកណ្តាល តាកែវ កំពត និងកែប ប្រវែងប្រមាណ ១៨០គីឡូម៉ែត្រ។ គម្រោងនេះគ្រោងចាយទុនប្រមាណ ១,៧០០លានដុល្លារអាមេរិក ហើយត្រូវបានសិក្សាគម្រោងល្អិតល្អន់រួចហើយ៕