(ភ្នំពេញ)៖ លោក ខ្វៃ អាទិត្យា អ្នកនាំពាក្យក្រសួងបរិស្ថាន បានបញ្ជាក់ប្រាប់បណ្តាញព័ត៌មាន Fresh News នៅថ្ងៃទី២០ ខែមេសា ឆ្នាំ២០២៤នេះ ថា កន្លងមកមានការផ្សព្វផ្សាយមួយចំនួនលើការសិក្សារបស់បរទេស ទាក់ទងនឹងស្ថានភាពព្រៃឈើនៅកម្ពុជា ការផ្សព្វផ្សាយនេះ មិនបានឆ្លុះបញ្ចាំងពីការពិតនៅកម្ពុជា។

អ្នកនាំពាក្យក្រសួងបរិស្ថានរូបនេះ បានឱ្យដឹងថា ជាក់ស្តែងរហូតមកដល់បច្ចុប្បន្ន កម្ពុជាបានបង្កើត និងកំពុងគ្រប់គ្រងបានយ៉ាងល្អនូវប្រព័ន្ធតំបន់ការពារធម្មជាតិ ដែលបានកើនឡើងពី២៣កន្លែង នៅឆ្នាំ១៩៩៣ រហូតដល់ ៧៣កន្លែង នៅឆ្នាំ២០២៣ ក្នុងទំហំផ្ទៃដី សរុប៧,២លានហិកតា ស្មើ៤១% នៃផ្ទៃដីប្រទេសទាំងមូល ដោយមានការចូលរួមពីសហគមន៍តំបន់ការពារធម្មជាតិ ចំនួន ១៩៣សហគមន៍ ដៃគូអភិវឌ្ឍន៍ និងអ្នកពាក់ព័ន្ធ ដើម្បីការអភិរក្សជីវៈចម្រុះ ការគ្រប់គ្រងធនធានធម្មជាតិ-វប្បធម៌ សម្រាប់ការអភិវឌ្ឍសេដ្ឋកិច្ចជាតិ និងមូលដ្ឋានប្រកបដោយចីរភាព។

ជាមួយគ្នានេះដែរ លោក ខ្វៃ អាទិត្យា បានបន្តថា ក្នុងរយៈពេល ៣០ឆ្នាំកន្លងមកនេះ វិស័យបរិស្ថាននៅកម្ពុជាមានការវិវឌ្ឍទៅមុខ គួរឱ្យកត់សំគាល់ ទាំងនៅក្នុងប្រទេស តំបន់ និងនៅលើពិភពលោក ជាពិសេសគឺការគ្រប់គ្រងធនធានធម្មជាតិ។ ជាការពិតកម្ពុជាបានបង្កើតតំបន់ការពារធម្មជាតិ និងរបៀងអភិរក្សជីវៈចម្រុះ រហូតដល់ទៅ៤១% នៃផ្ទៃដីប្រទេស ដែលចំនួននេះស្មើនឹងជាង២ដង នៃផែនការជីវៈចម្រុះសកលដែលបានកំណត់នៅក្នុងអនុសញ្ញាសហប្រជាជាតិស្តីពីជីវៈចម្រុះ ក្នុងការបង្កើតតំបន់ការពារធម្មជាតិឱ្យបាន ១៧% ត្រឹមឆ្នាំ២០២០។

មន្ត្រីនាំពាក្យក្រសួងបរិស្ថាន បានលើកឡើងថា អនុលោមតាម <<យុទ្ធសាស្រ្តបញ្ចកោណ>> ដំណាក់កាលទី១ របស់រាជរដ្ឋាភិបាល អាណត្តិទី៧នៃរដ្ឋសភា និងឈរលើមូលដ្ឋាននៃគោលនយោបាយ និងយុទ្ធសាស្រ្តដែលមានជាធរមានព្រមទាំងក្របខណ្ឌអនុសញ្ញាសហប្រជាជាតិ-អន្តរជាតិពាក់ព័ន្ធ ក្រសួងបរិស្ថានបានរៀបចំ <<យុទ្ធសាស្រ្តចក្រាវិស័យបរិស្ថាន(២០២៤-២០២៨)>> ដើម្បីតម្រង់ទិស និងចង្អុលបង្ហាញអាទិភាពការងារ ក្នុងការលើកកម្ពស់កិច្ចគាំពារបរិស្ថាន ការការពារធនធានធម្មជាតិ និងការអភិវឌ្ឍប្រកបដោយចីរភាព ក្នុងមុំចំនួន៣ គឺ <<ភាពស្អាត ភាពបៃតង និង ចីរភាព>> សំដៅឆ្ពោះទៅសម្រេចការអភិវឌ្ឍប្រកបដោយអព្យាក្រឹតកាបូននៅឆ្នាំ២០៥០។

បន្ថែមពីនេះ លោក ខ្វៃ អាទិត្យា បានថ្លែងថា ផ្តើមចេញពីទស្សនវិស័យនៃការគ្រប់គ្រងធនធានធម្មជាតិឱ្យមាននិរន្តរភាព និងការអនុវត្តយុទ្ធសាស្រ្តចក្រានៃ <<ភាពបៃតង >> ក្រសួងបរិស្ថាន ក៏បានដាក់ចេញនូវវិធានការចំនួន៤ រួមមាន៖ ការអនុវត្តច្បាប់១០០% ការពង្រឹងកិច្ចសហការជាមួយអាជ្ញាធរមូលដ្ឋានគ្រប់ថ្នាក់ ដើម្បីទប់ស្កាត់បទល្មើសធនធានធម្មជាតិ កិច្ចសហការជាមួយអង្គភាពប្រឆាំងអំពើពុករលួយ និងបញ្ជាការដ្ឋានកងរាជអាវុធហត្ថលើផ្ទៃប្រទេស ដើម្បីពង្រឹងការអនុវត្តច្បាប់ និងការអនុវត្តផែនការដាំស្តារដើមឈើបង្កើនគម្របព្រៃឈើឱ្យបាន៦០% ត្រឹមឆ្នាំ២០៥០។

ជាមួយគ្នានេះកម្ពុជាក៏បាននិងកំពុងអនុវត្តគំនិតផ្តួចផ្តើមជាច្រើនដែលពាក់ព័ន្ធនឹងសម្បត្តិធម្មជាតិដ៏សម្បូរបែប និងសេវាកម្មប្រព័ន្ធអេកូឡូស៊ីរបស់កម្ពុជា ប្រកបដោយតម្លាភាព និងប្រសិទ្ធភាព ក្នុងនោះរួមមាន៖ ការអនុវត្តកម្មវិធី REED ការបង់ថ្លៃសេវាកម្មប្រព័ន្ធអេកូឡូស៊ី ការអភិវឌ្ឍន៏គោលដៅលំហែបៃតង និងយុទ្ធនាការ <<ដាំដើមឈើយ៉ាងតិចចំនួន ១លានដើម>> <<ពន្លកបៃតង>>។ល។

តាមរយៈសកម្មភាព កម្មវិធី និងគំនិតផ្តួចផ្តើមខាងលើ គឺជាតឹកតាងសរបញ្ជាក់យ៉ាងច្បាស់ថា ធនធនាធម្មជាតិ ជីវៈចម្រុះ និងប្រព័ន្ធអេកូឡូស៊ីនៅកម្ពុជា មានភាពល្អប្រសើរ ស្រស់ស្អាត និងទាក់ទាញភ្ញៀវទេសចរជាតិ និងអន្តរជាតិឱ្យមកទស្សនាកំសាន្ត មិនដូចអ្វីដែលរបាយការណ៍ ដែលក្រុមអគតិមួយចំនួន បង្កើតឡើង និងបានចុះផ្សាយ ក្នុងចេតនាធ្វើឱ្យសាធារណជន មានការភាន់ច្រឡំ ប៉ះពាល់កិត្តិយស និងដំណើរអភិវឌ្ឍន៍របស់កម្ពុជា ដែលកំពុងរស់នៅក្នុងសុខសន្តិភាព និងឈានឆ្ពោះទៅសម្រេចទស្សនវិស័យកម្ពុជា ជាប្រទេសអព្យាក្រឹតកាបូន និងមានគម្របព្រៃ៦០% នៅឆ្នាំ២០៥០៕