(ភ្នំពេញ)៖ បន្ទាប់ពីបានផ្ញើសាររំលែកទុក្ខនៅល្ងាចថ្ងៃទី១៨ ខែមេសា ឆ្នាំ២០២៤នេះ អ្នកឧកញ៉ា ឡេង ណាវ៉ាត្រា អគ្គនាយកក្រុមហ៊ុន ហ្គាឡាក់ស៊ី ណាវ៉ាត្រា គ្រុប បានចាត់ឲ្យ អ្នកឧកញ៉ា ឡេង ប្រុស ដឹកនាំបុគ្គលិកជាន់ខ្ពស់ នៃគ្រួសារ Galaxy អញ្ជើញចូលបុណ្យសព មហាឧបាសកអ្នកឧកញ៉ា គឹម ចំរើន (លឹម តេកអៀក) ដែលត្រូវជាឪពុកបង្កើតរបស់លោកជំទាវ គឹម ចាន់ណា (ភរិយាអ្នកឧកញ៉ា លាង ម៉េង) និងត្រូវជាឪពុកក្មេករបស់អ្នកឧកញ៉ា លាង ម៉េង ដែលបានធ្វើមរណកាល កាលពីថ្ងៃទី១៧ ខែមេសា ឆ្នាំ២០២៤ វេលាម៉ោង ១០៖០៥នាទីព្រឹក ក្នុងជន្មាយុ៨៣ឆ្នាំ ដោយជរាពាធ។

អ្នកឧកញ៉ា ឡេង ណាវ៉ាត្រា រួមទាំងថ្នាក់ដឹកនាំ បុគ្គលិកទាំងអស់នៃក្រុមហ៊ុន ហ្គាឡាក់ស៊ី ណាវ៉ាត្រា សូមសម្តែងនូវទុក្ខវិប្បយោគជាមួយ អ្នកឧកញ៉ា ព្រមទាំងក្រុមគ្រួសារចំពោះការ បាត់បង់ អ្នកឧកញ៉ា មហាឧបាសក គឹម ចំរើន (លឹម កេត អៀក) ជាឪពុកបង្កើត ឪពុកក្មេក ជីតា និងតាទួត ជាទីគោរពស្រលាញ់ប្រកបដោយព្រហ្មវិហារធម៍ ដ៏ជ្រាលជ្រៅបំផុតចំពោះកូនៗ ចៅៗទាំងអស់ ដែលកន្លងមកក្នុងមួយជីវិតរបស់មហាឧបាសក តែងតែបានខិតខំចិញ្ចឹមបីបាច់ថែរក្សាអប់រំទូន្មានបុត្រធីតា និងចៅៗ ប្រកបដោយទឹកចិត្តសណ្តោសប្រណីដ៏ថ្លៃថ្លារហូតក្លាយជាបញ្ញាវ័ន្ត ជាថ្នាក់ដឹកនាំ និងជាធនធានមនុស្សដ៏មានតម្លៃ មានគុណធម៌ សម្រាប់សង្គមជាតិកម្ពុជា។

ក្នុងវេលាប្រកបដោយសាមាន្យទុក្ខដ៏ក្រៀមក្រំនេះ យើងខ្ញុំទាំងអស់គ្នាសូមឧទ្ទិសបួងសួងដល់ដួងវិញ្ញាណក្ខន្ធ អ្នកឧកញ៉ា មហាឧបាសក គឹម ចំរើន (លឹម កេត អៀក) បានទៅកាន់សុគតិភពកុំបីឃ្លៀងឃ្លាតឡើយ។ សូម អ្នកឧកញ៉ា លាង ម៉េង សហស្ថាបនិកក្រុមហ៊ុនជីបម៉ុង និងលោកជំទាវព្រមទាំងក្រុមគ្រួសារមេត្តា ទទួលនូវសាមាន្យចិត្តចូលរួមរំលែកទុក្ខដ៏សែនក្រៀមក្រំបំផុតអំពីយើងខ្ញុំទាំងអស់គ្នា។

បច្ចុប្បន្នសពអ្នកឧកញ៉ា មហាឧបាសក គឹម ចំរើន (លីម តេកអៀក) កំពុងតម្កល់នៅគេហដ្ឋានលេខ២៣ ផ្លូវលេខ១៧ គំរោង២ បុរីប៉េងហួតបឹងស្នោរ រាជធានីភ្នំពេញ ដើម្បីធ្វើបុណ្យតាមប្រពៃណី និងព្រះពុទ្ធសាសនា៕