(មូស្គូ)៖ សេតវិមានបាននិយាយកាលពីថ្ងៃព្រហស្បតិ៍ថា ប្រទេសរុស្ស៊ីកំពុងដឹកជញ្ជូនប្រេងចម្រាញ់ដោយស្ងាត់ៗ ទៅកាន់ប្រទេសកូរ៉េខាងជើង ក្នុងកម្រិតដែលហាក់ដូចជាបំពានច្បាប់កំណត់ ដោយក្រុមប្រឹក្សាសន្តិសុខអង្គការសហប្រជាជាតិ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី០២ ខែឧសភា ឆ្នាំ២០២៤។

ការលាតត្រដាងនេះ បានកើតឡើងនៅថ្ងៃដំបូងនៃការរំសាយក្រុមអ្នកជំនាញរបស់អង្គការសហប្រជាជាតិ ដែលតាមដានការអនុវត្តការដាក់ទណ្ឌកម្ម របស់អង្គការសហប្រជាជាតិជាយូរមក លើកម្មវិធីអាវុធនុយក្លេអ៊ែរ និងមីស៊ីលរបស់កូរ៉េខាងជើង បន្ទាប់ពីការវេតូរបស់រុស្ស៊ី។

អ្នកនាំពាក្យសន្តិសុខជាតិរបស់សេតវិមាន លោក John Kirby បានប្រាប់អ្នកយកព័ត៌មានថា <<ក្នុងពេលជាមួយគ្នាដែលទីក្រុងមូស្គូកំពុងប្រើអំណាចវេតូ ចំពោះការបន្តអាណត្តិរបស់គណៈកម្មាធិការជំនាញនេះ ប្រទេសរុស្ស៊ីកំពុងដឹកជញ្ជូនប្រេងចម្រាញ់ពីកំពង់ផែ Vostochny ទៅកាន់សាធារណរដ្ឋប្រជាមានិតប្រជាធិបតេយ្យកូរ៉េ (កូរ៉េខាងជើង)>>។

នៅក្រោមទណ្ឌកម្មរបស់អង្គការសហប្រជាជាតិ ទីក្រុងព្យុងយ៉ាងអាចនាំចូលប្រេងចម្រាញ់បានត្រឹមតែ ៥០០,០០០ បារ៉ែលប៉ុណ្ណោះក្នុងមួយឆ្នាំ។ បេសកកម្មរុស្ស៊ី និងកូរ៉េខាងជើងប្រចាំអង្គការសហប្រជាជាតិនៅទីក្រុងញូវយ៉ក មិនបានឆ្លើយតបភ្លាមៗ ចំពោះសំណើសុំការអត្ថាធិប្បាយ លើការចោទប្រកាន់របស់សហរដ្ឋអាមេរិកនេះទេ។

លោក Kirby បាននិយាយថា ប្រទេសរុស្ស៊ីបានដឹកជញ្ជូនប្រេងចម្រាញ់ជាង ១៦៥,០០០ បារ៉ែលទៅកាន់ប្រទេសកូរ៉េខាងជើង​ក្នុងខែមីនាតែមួយ ហើយដោយសារភាពជិតស្និទ្ធនៃកំពង់ផែពាណិជ្ជកម្មរុស្ស៊ី និងកូរ៉េខាងជើង រុស្ស៊ីអាចរក្សាការនាំចេញទាំងនេះដោយគ្មានកំណត់>>។

គួរជម្រាបថា កាលពីចុងខែមីនាកន្លងទៅ រុស្ស៊ីបានរារាំងការធ្វើបច្ចុប្បន្នភាពប្រចាំឆ្នាំ ដោយអ្នកឃ្លាំមើលការដាក់ទណ្ឌកម្មរបស់អង្គការសហប្រជាជាតិ ដែលជាវិធានការមួយដែលមន្ត្រីអាមេរិកបានចោទថា ត្រូវបានរៀបចំឡើងដោយទីក្រុងម៉ូស្គូ ដើម្បីបិទបាំងការរំលោភលើដំណោះស្រាយ របស់ក្រុមប្រឹក្សាសន្តិសុខអង្គការសហប្រជាជាតិ>>។

សហរដ្ឋ​អាមេរិក និង​កូរ៉េ​ខាង​ត្បូង​បាន​បង្កើត​ក្រុម​ការងារ​មួយ​កាល​ពី​ខែ​មីនា ក្នុង​គោល​បំណង​រារាំង​កូរ៉េ​ខាង​ជើង​ពី​ការ​ទិញ​ប្រេង​ខុស​ច្បាប់។

សហរដ្ឋអាមេរិក និងប្រទេសមួយចំនួនទៀត ក៏បានចោទប្រកាន់កូរ៉េខាងជើងផងដែរ ពីការផ្ទេរអាវុធទៅឱ្យរុស្ស៊ី ដើម្បីប្រើប្រាស់ប្រឆាំងនឹងការឈ្លានពាននៅអ៊ុយក្រែន។ ទាំងទីក្រុងមូស្គូ និងទីក្រុងព្យុងយ៉ាង បានបដិសេធការចោទប្រកាន់នេះ ប៉ុន្តែកាលពីឆ្នាំមុនបានប្តេជ្ញាថា នឹងធ្វើឱ្យទំនាក់ទំនងយោធាកាន់តែស៊ីជម្រៅ។

អ្នកឃ្លាំមើលការដាក់ទណ្ឌកម្មរបស់អង្គការសហប្រជាជាតិ បានបញ្ជាក់ថា បំណែកនៃមីស៊ីលដែលបានធ្លាក់ក្នុងទីក្រុង Kharkiv របស់អ៊ុយក្រែន កាលពីថ្ងៃទី ០២ ខែមករា មានប្រភពមកពីមីស៊ីលផ្លោងស៊េរី Hwasong 11 របស់កូរ៉េខាងជើង នេះបើយោងតាមរបាយការណ៍ដែលមើលឃើញដោយទីភ្នាក់ងារ Reuters កាលពីថ្ងៃចន្ទ៕