(ភ្នំពេញ)៖ លោក ស៊ិន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានប្រាប់អង្គភាព Fresh News នៅថ្ងៃទី២២ ខែកញ្ញានេះថា អាកាសយាន្តដ្ឋានអន្តរជាតិតារាសាគរ ខេត្តកោះកុង ដែលនឹងបញ្ចប់ការសាងសង់ នៅខែតុលាខាងមុខដ៏ខ្លីនេះ ហើយគ្រោងបើកដំណើរការសាកល្បងនៅខែធ្នូ ឆ្នាំ២០២១នេះ អាចនឹងត្រូវពន្យារពេលរហូតដល់ដើមឆ្នាំ២០២២វិញ។

ការពន្យារពេលបើកដំណើរការសាកល្បងនេះ ដោយសារតែក្រោយការវាយតម្លៃ ត្រួតពិនិត្យចុងក្រោយរបស់ រដ្ឋលេខាធិការដ្ឋានអាកាសចរណ៍ស៊ីវិល មើលឃើញថា មានការងារខ្លះនៅសេសសល់ ដែលក្រុមហ៊ុនត្រូវការពេលវេលាបន្ថែមទៀតក្នុងការបំពេញ ដូចជាការផ្តល់ព័ត៌មាន និងឯកសារ ពាក់ព័ន្ធនឹងសុវត្ថិភាព មុននឹងអាកាសចរណ៍ស៊ីវិលផ្សាយជាផ្លូវការ។

លោកបានបញ្ជាក់យ៉ាងដូច្នេះថា <<គាត់ត្រៀមខ្លួនរួចអស់ហើយ ប៉ុន្តែតាមការត្រួតពិនិត្យ និងវាយតម្លៃរបស់រដ្ឋលេខាធិការដ្ឋានអាកាសចរណ៍ស៊ីវិល គាត់អាចត្រូវការពេលវេលាបន្ថែមបន្តិចទៀត ដើម្បីបើកប្រតិបត្តិការសាកល្បង អីចឹងផែនការបើកអាចធ្វើនៅចុងខែធ្នូនេះ ឬអាចរំកិលទៅដើមឆ្នាំក្រោយ>>។

ព្រលានយន្ដហោះតារាសាគរ ស្ថិតក្នុងស្រុកបុទមសាគរ ខេត្តកោះកុង ជាវិនិយោគដោយក្រុមហ៊ុនចិន Union Development Group លើទំហំទឹកប្រាក់១៥០លានដុល្លារ ជាការវិនិយោគសម្រាប់គាំទ្រ ដល់វិស័យទេសចរណ៍។

ដោយឡែកសម្រាប់ ការសាងសង់អាកាសយានដ្ឋានអន្តរជាតិសៀមរាបថ្មីវិញ មកទល់បច្ចុប្បន្ននេះបានប្រមាណ៤៥%ហើយ នឹងគ្រោងបញ្ចប់ការសាងសង់ នៅចុងឆ្នាំ២០២២ខាងមុខនេះ បើទោះបីជាខេត្តទេសចរណ៍មួយនេះ កំពុងប្រឈមមុខនឹងការរីករាលដាលនៃជំងឺកូវីដ១៩ ដែលឈានទៅដល់ការបិទខ្ទប់ផ្នែកខ្លះក៏ដោយ។

លោក ស៊ិន ចាន់សិរីវុត្ថា បានគូសបញ្ជាក់ថា បើទោះបីជាខេត្តនេះ កំពុងស្ថិតក្នុងការខ្ទប់ក៏ដោយ ប៉ុន្តែមិនបានប៉ះពាល់ដល់ដំណើរការនៃសាងសង់ឡើយ ដោយកម្មករនៅតែបំពេញការងារបានដូចដើម គ្រាន់តែដំណើរការយឺតតិចតួច។

ខណៈពេលដែលអាកាសយានដ្ឋាននេះ ដំណើរការសាងសង់បានជិតពាក់កណ្តាល បញ្ហាដែលកំពុងប្រឈមមុខ គឺការកង្វះទឹកស្អាតសម្រាប់ផ្គត់ផ្គង់ ដោយសារទីតាំងអាកាសយានដ្ឋានថ្មីនេះ មានចម្ងាយឆ្ងាយពីក្រុងសៀមរាប ប្រមាណ៥០គីឡូម៉ែត្រ ដែលពិបាកដល់ការផ្គត់ផ្គង់ទឹក។ ប៉ន្តែបញ្ហានេះត្រូវបានដោះស្រាយ ដោយក្រុមហ៊ុនបានវិនិយោគនូវទឹកប្រាក់ប្រមាណ១៣លានដុល្លារ តភ្ជាប់បណ្តាញទឹកពីក្រុងសៀមរាប មកទីតាំងសាងសង់។

អាកាសយានដ្ឋានអន្តរជាតិសៀមរាបថ្មី ត្រូវបានសាងសង់លើផ្ទៃដី៧០០ហិកតា ក្នុងស្រុកសូត្រនិគម មានចម្ងាយប្រមាណ៥០គីឡូម៉ែត្រពីក្រុងសៀមរាប និង៤០គីឡូម៉ែត្រពីអាកាសយានដ្ឋានចាស់។ អាកាសយានដ្ឋានថ្មីនេះ វិនិយោគដោយក្រុមហ៊ុន Angkor International Airport Investment (Cambodia) Co.,Ltd (AIAI) វិនិយោគជាលក្ខណៈ BOT រយៈពេល៥៥ឆ្នាំ៕