(ស្វាយរៀង)៖ មានការភ្ញាក់ផ្អើលទាំងព្រឹកដល់ក្រុមគ្រួសារ និងអ្នកភូមិ ខណៈប្រទះឃើញយុវជនម្នាក់ចងកសម្លាប់ខ្លួននៅក្នុងផ្ទះ និងរាយការណ៍ទៅសមត្ថកិច្ចមកពិនិត្យសពភ្លាមៗ នៅវេលាម៉ោង៨ព្រឹក ថ្ងៃទី០២ ខែមីនា ឆ្នាំ២០២១នេះ ស្ថិតនៅក្នុងភូមិចំបក់ សង្កាត់ចេក ក្រុងស្វាយរៀង ខេត្តស្វាយរៀង។
មន្ដ្រីនគរបាលក្រុងស្វាយរៀង បានឲ្យដឹងថា បុរសខាងលើមានឈ្មោះ បេ រតនា អាយុ២៣ឆ្នាំ មុខរបរមិនពិតប្រាកដ រស់នៅភូមិ ឃុំ កើតហេតុខាងលើ ។បើតាមក្រុមគ្រួសារ បញ្ជាក់ថា កូនប្រុសរបស់គាត់មានជំងឺសរសៃប្រសាទយូរឆ្នាំមកហើយ ហើយធ្លាប់យកទៅព្យាបាលនៅមន្ទីរពេទ្យ និងផឹកថ្នាំជាប្រចាំ ប៉ុន្តែមិនបានធូរស្រាលសោះឡើយ។
ដោយនៅថ្ងៃកើតហេតុគាត់ បានចេញពីផ្ទះមកយានដ្ឋានជុសជុលរថយន្ត នៅសង្កាត់ចេកទល់ មុខវិទ្យាល័យចេកដូចសព្វដង មិនបានចាប់អារម្មណ៍ និងកូនប្រុសឡើយ។ ក្រោយមកប្រមាណកន្លះម៉ោង ស្រាប់តែមានការភ្ញាក់ផ្អើលពីសំណាក់ក្រុមគ្រួសារ បានទូរស័ព្ទមកប្រាប់គាត់ថា កូនរបស់គាត់បានចងកស្លាប់បាត់ទៅហើយ។
ក្រោយពីកើតហេតុ សមត្ថកិច្ចមូលដ្ឋាន និងនគរបាលជំនាញក្រុង ព្រមទាំងគ្រូពេទ្យ បានចុះមកកន្លែងកើតហេតុពិនិត្យសព ដោយសន្និដ្ឋានថា ជនរងគ្រោះពិតជាស្លាប់ដោយសារចងក ប្រាកដមែន ទើបប្រគល់សពទៅឲ្យក្រុមគ្រួសារយកទៅធ្វើបុណ្យតាមប្រពៃណី៕